Unnið út í eitt í símaveri Strætó

Unnið er út í eitt í símaveri Strætó. Vinnudagarnir hafa verið langir en þrátt fyrir álagið er stemningin góð, að sögn Júlíu Þorvaldsdóttur, sviðsstjóra á farþegaþjónustusviði Strætó.

„Við sjáum fram á að þjónustan verði eins góð og best verður á kosið og við erum sannfærð um að verkefnið er í bestu höndum sem völ er á,“ tekur hún fram.

Starfsmönnum við símsvörun hjá Strætó hefur verið fjölgað frá því að fyrirtækið tók við rekstri Ferðaþjónustu fatlaðra um áramótin.

„Núna eru átta til tíu manns við símsvörunina og fleiri þegar mikið mæðir á. Það leggjast allir á eitt við að svara, bæði stjórnendur og aðrir. Við eigum ótrúlega góð samskipti við flesta farþega og forstöðumenn sambýla og heimila. En það hefur verið vegið verulega að okkar starfsfólki, bæði starfsfólki í þjónustuveri og bílstjórum Ferðaþjónustunnar. Umræðan hefur verið óvægin og ósanngjörn á samfélagsmiðlum og í fjölmiðlum,“ segir Júlía.

„Til þess að þjónustan verði sem best skiptir okkur máli að fá allar ábendingar til okkar frá fyrstu hendi, það er þeim sem sjálfir nota Ferðaþjónustu fatlaðra. Þannig getum við komið í veg fyrir að það sem fer úrskeiðis gerist ekki aftur. Málin leysast ekki á Facebook eða í fjölmiðlum.“

Verkefnin við símsvörun hafa fjórfaldast frá áramótum, að sögn Júlíu. „Einstaka viðskiptavinir Ferðaþjónustu fatlaðra eru stressaðir og upplifa þjónustuna verri en hún raunverulega er.

Meðalbiðtíminn í síma hefur hins vegar verið rúmlega tvær mínútur. Það mæddi mest á 5. og 6. janúar en símtölum hefur fækkað síðan þá.“ 

Júlía bendir á að aldrei verði komist hjá mistökum. „Við þurfum hins vegar að fá að vita milliliðalaust hver atvikin eru þannig að hægt sé að koma í veg fyrir að þau verði endurtekin. Við trúum hundrað prósent á þetta verkefni og hlökkum til samvinnu við farþega og starfsfólk Ferðaþjónustu fatlaðra.“