Advania eitt 20 fyrstu í heimi með skýjalausn Microsoft

Advania á Íslandi er eitt 20 fyrirtækja í heiminum sem vinnur með Microsoft að uppsetningu umhverfis tölvuskýja þar sem fyrirtækjum er boðin vistun og hýsing á bæði forritum og gögnum.

Fyrirtækið varð ofan á í vali Microsoft þar sem margir voru um hituna og því með þeim fyrstu til að fá Cloud Solutions Provider viðurkenningu Microsoft. Til stendur að Advania kynni fyrirtækjum hér þjónustuna seinni part vikunnar.

„Við erum mjög stolt af þessu,“ segir Gestur G. Gestsson, forstjóri Advania. „Fyrst og fremst er það mikill heiður fyrir fyrirtækið að vera valið eitt af þessum tuttugu samstarfsaðilum Microsoft í skýjalausnum í heiminum. Við lítum á það sem heiður bæði fyrir okkur hér á Íslandi, en ekki síður fyrir okkur sem norrænt fyrirtæki því við getum boðið þessar lausnir á Norðurlöndunum.“

Gestur segir að núna geti Advania boðið viðskiptavinum sínum aðgengi að Microsoft þjónustum með öðrum hætti en áður hafi verið mögulegt. „Og í því felast mikil tækifæri fyrir viðskiptavini okkar.“

Með vistun gagna og rekstri hugbúnaðar í tölvuskýjum segir Gestur skrefið tekið til framtíðarsýnar sem talað hafi verið um í rúman áratug.

„Við færumst stöðugt nær þeim tíma að það heyri sögunni til að fólk sæki forrit niður tölvurnar sínar, heldur vinni á forritum sem vistuð eru í skýinu, með öllum þeim kostum sem því fylgir, bæði varðandi aðgengi, öryggi og hagkvæmni. Það hefur gríðarmikið gerst í þessum málum síðustu tvö til þrjú ár upp á að gera þessar lausnir jafngóðar og mörgum tilfellum betri en þegar fólk er með forritin í tölvunni.“

Með því að nýta skýið segir Gestur möguleika fyrirtækja á hagræðingu í rekstri stóraukast. „Það er gríðarlega mikilvægt því þá er verið að kaupa þessa þjónustu alla í áskrift. Ef fyrirtæki er til dæmis með mikið af sumarstarfsmönnum þá er hægt kaupa forrit og annað sem nauðsynlegt er vegna þess, en draga svo aftur saman þegar sumri lýkur.“ 

Meðal þess sem boðið er upp á í skýjaumhverfi Microsoft er hýsing tölvukerfa, gagnahýsing og aðgangur að viðskiptahugbúnaði á borð við Microsoft Dynamics NAV bókhaldskerfi og Office 356 hugbúnaðarvöndulinn. Öll gögn, kerfi og hugbúnaður eru hýst hjá Advania á Íslandi.