Kvikmyndahúsin heyja varnarbaráttu

Aðsókn að kvikmyndahúsum hefur verið á niðurleið síðustu ár. Það sem af er ári hefur gestum fækkað um 16 prósentum miðað við sama tímabili árið 2009. Þó hefur 3 prósenta aukning verið í aðsókn í ár miðað við sama tímabil í fyrra.

„Almennt hefur aðsókn dregist saman,“ segir Hallgrímur Kristinsson, stjórnarformaður Félags rétthafa í sjónvarps og kvikmyndaiðnaði (FRÍSK).

Þá hefur gestum á hverja sýningu líka fækkað úr 85 að meðaltali árið 2009 í 57 á þessu ári. Hins vegar hafi tekjur kvikmyndahúsanna af miðasölu að mestu staðið í stað en þær voru 1.485 milljónir króna árið 2014.

Konstantín Mikaelsson, yfirmaður kvikmyndadeildar Senu, segir aðsókn hafa dregist saman um tvö til þrjú prósent á ári frá 2009.

Tvær ástæður er einkum fyrir minni aðsókn að kvikmyndahúsum að sögn Konstantíns: Ólöglegt niðurhal og auknar vinsældir efnisveitna sem ekki hafi sýningarétt á efni á Íslandi á borð við Netflix, Hulu og Amazon. „Þessi grái markaður borgar enga skatta á Íslandi. Svo er það náttúrulega ólöglega niðurhalið sem er okkar helsti óvinur,“ segir Konstantín.

Hallgrímur segir ólöglegt niðurhal ekki einu skýringuna á samdrætti í kvikmyndaðsókn. Framboð annarrar afþreyingar hafi aukist sem og að sjónvörp séu orðin betri. Engu síður bitni það verulega á aðsókn að kvikmyndahúsum þegar hægt sé að ná í bíómyndir ólöglega á meðan þær eru enn í bíó. „Við sjáum það að þær myndir sem eru að detta inn og eru að koma inn í góðum gæðum hafa áhrif á aðsókn,“ segir Hallgrímur.

Hallgrímur nefnir sem dæmi að myndinni Aulinn ég hafi verið halað niður ólöglega með íslensku tali um þrjátíu þúsund sinnum. „Það kostaði hátt í tíu milljónir að talsetja myndina þannig að það er erfitt að eiga við þetta,“ segir hann. 

Hallgrímur vill að stjórnvöld grípi til frekari aðgerða gegn ólöglegu niðurhali en segir að talað hafi verið fyrir daufum eyrum.