FME sektar Arion um 30 milljónir

Fjármálaeftirlitið hefur sektað Arion banka um þrjátíu milljónir króna vegna brots á lögum um verðbréfaviðskipti. Bankinn var sektaður fyrir að hafa í febrúar í fyrra selt hlutabréf sem hann átti í Högum hf á sama tíma og bankinn bjó yfir innherjaupplýsingum sem vörðuðu Haga.

Með innherjaupplýsingum er átt við nægjanlega tilgreindar upplýsingar sem ekki hafa verið gerðar opinberar og varða beint eða óbeint útgefendur fjármálagerninga, fjármálagerningana sjálfa eða önnur atriði og eru líklegar til að hafa marktæk áhrif á markaðsverð fjármálagerninganna, að því er segir í úrskurði FME.

Málsatvik eru þau að hluthafi í Högum óskaði eftir því við Arion banka að bankinn leitaði að kaupendum að 3-6 prósenta hlut í félaginu, en um var að ræða hluthafa sem var fjárhagslega tengdur frumherjum í Högum. Í kjölfar beiðninnar hafði deild markaðsviðskipta hjá Arion banka samband við lífeyrissjóði í leit að kauptilboðum.

Í úrskurðinum segir að brátt hafi komið í ljós að talsverð eftirspurn hafi verið fyrir hendi og að deild markaðsviðskipta hafi þá ákveðið að bjóða öðrum aðilum, sem og Arion banka sjálfum, að selja hlut á sama gengi. Deild markaðsviðskipta hafi þá haft samband við fjárfesta eftir lokun markaða föstudaginn 21. febrúar og helgina 22. til 22. febrúar. Á forviðskiptatímabilinu 24.febrúar hafi Arion tilkynnt til Nasdaq OMX Iceland tilkynnt viðskipti með hlut í Högum. „Síðar sama dag bárust flöggunartilkynningar, m.a frá Arion banka þar sem greint var frá sölu Arion banka á hlutum hf. Öll viðskiptin voru á genginu 42 krónur á hlut,“ segir í úrskurðinum.

Bankinn sagði ekki brotið á innherjareglum og byggði afstöðu sína á Evróputilskipun um innherjaviðskipti og markaðsmisnotkun. Hann andmælti þó ekki mati FME að um innherjaupplýsingar væri að ræða.

Úrskurðinn má lesa í heild hér.