Móðir stúlkunnar í hópnauðgunarmálinu: Léttir og viðurkenning að málinu var áfrýjað

„Við erum mjög sátt og okkur er bara létt,“ segir Lilja Björnsdóttir, móðir stúlku sem kærði fimm skólabræður sína fyrir hópnauðgun í maí í fyrra. Piltarnir voru allir sýknaðir af nauðgunarákæru í Héraðsdómi Reykjavíkur í nóvember síðastliðnum en ríkissaksóknari ákvað í dag að áfrýja dómnum til Hæstaréttar.

„Sýknudómurinn var svolítið erfiður þótt það hafi verið búið að vara okkur við honum,“ segir Lilja í samtali við Vísi. „Þetta er viðurkenning á því að það er eitthvað á bak við þessa kæru.“

Lilja er þeirrar skoðunar að dómurinn hafi verið út í hött og verulega hallað á dóttur hennar við meðferð málsins. Það sem stutt hafi hennar frásögn hafi ekki verið tekið til greina.

„Það voru lykilvitni sem breyttu framburði sínum og fleira þannig að maður var hálfgáttaður á þessu.“

Lilja segist vonast til þess að málið fari vel og skilaboðin út í samfélagið verði á þá leið að það sem átti sér stað í íbúðinni í Breiðholti sé ekki leyfilegt. Allir verði að átta sig á því.

Í yfirlýsingu sem Lilja sendi Vísi í kjölfar þess að sýknudómur féll í héraði í nóvember lét hún þau orð falla að „Ef þú ert númer fimm í röðinni getur þú bókað að um nauðgun er að ræða.“ Hún segist standa við yfirlýsinguna.

„Ef það eru fimm þá er það nauðgun og ofbeldi. Ég myndi vilja sjá kvenmann gefa sig fram sem vill hafa þetta svoleiðis.“

Að neðan má sjá viðtal Snærósar Sindradóttur við Lilju fyrir kvöldfréttir Stöðvar 2 og Ísland í dag eftir að sýknudómurinn féll í héraði.