Lyfseðilsskyld lyf lækka um 773 milljónir

Endurskoðun lyfjagreiðslunefndar á verði lyfseðilsskyldra lyfja hér á landi leiðir til lækkunar lyfjaverðs sem áætlað er að nemi samtals um 773 milljónum króna á ári. Lækkunin leiðir til lægri útgjalda sjúkratrygginga og lækkar einnig kostnað sjúklinga.

Í tilkynningu frá velferðarráðuneytinu segir að verðendurskoðun á apótekslyfjum var skipt í tvo áfanga, verðlækkanir vegna fyrri áfangans tóku gildi 1. júní sl. og vegna seinni áfangans þann 1. október sl. Áætluð lækkun lyfjakostnaðar vegna fyrri áfangans er um 273 milljónir króna og vegna seinni áfangans um 314 milljónir króna á ársgrundvelli.

Samtals mun því kostnaður vegna apótekslyfja lækka um 587 milljónir kr. sem skiptist á milli sjúkratrygginga og sjúklinga.

Þann 1. júlí sl. tóku gildi lækkanir á sjúkrahúslyfjum í kjölfar endurskoðunar lyfjagreiðslunefndar á verði þeirra. Áætlað er að lyfjakostnaður sjúkratrygginga lækki við það um 186 milljónir kr. á ársgrundvelli.

Í lyfjalögum er kveðið á um það markmið að lyfjakostnaði hér á landi skuli haldið í lágmarki. Lyfjagreiðslunefnd er falið að sjá til þess að lyfjaverð sé að jafnaði sambærilegt við verð í viðmiðunarlöndunum Danmörku, Svíþjóð, Finnlandi og Noregi.