Viðskipti innlent

Kaupmáttur jókst um 1,4 prósent í janúar

ingvar haraldsson skrifar
Launavístala Hagstofunnar hefur hækkað um 6,3 prósent á síðustu 12 mánuðum.
Launavístala Hagstofunnar hefur hækkað um 6,3 prósent á síðustu 12 mánuðum. vísir/vilhelm
Vísitala kaupmáttar launa hækkaði um 1,4 prósent í janúar og stendur í 121,9 stigum samkvæmt gögnum frá Hagstofu Íslands. Kaupmáttur síðustu 12 mánuði hefur því aukist um 5,5 prósent. Hækkunin í janúar er breyting frá desember síðastliðnum þegar vísitalan lækkaði um 0,3 prósent.

Launavístala Hagstofunnar hækkaði einnig í janúar eða um 0,7 prósent. Síðustu 12 mánuði hefur vísitalan hækkað um 6,3 prósent.

Þá útskýrir Hagstofan einnig muninn á vísitölunum tveimur:

Launavísitala er verðvísitala sem byggir á gögnum úr launarannsókn Hagstofu Íslands og sýnir breytingar á verði vinnustundar fyrir fasta samsetningu vinnutíma. Vísitalan tekur mið af breytingum reglulegra launa sem greidd eru fyrir umsaminn vinnutíma hvort sem um er að ræða dagvinnu eða vaktavinnu. Tekið er tillit til hvers konar álags-, bónus- og kostnaðargreiðslna sem gerðar eru upp á hverju útborgunartímabili. Hvorki er tekið tillit til tilfallandi yfirvinnu né óreglulegra greiðslna enda er í lögum um launavísitölu ætlast til að breytingar á vinnutíma og samsetningu hans hafi ekki áhrif á vísitöluna. 

Vísitala kaupmáttar launa byggir á launavísitölu og vísitölu neysluverðs. Almennt eykst kaupmáttur launa þegar laun hækka umfram verðlag en minnkar þegar verðbólga er meiri en launahækkanir. Hafa þarf í huga að kaupmáttur launa er annar en kaupmáttur ráðstöfunartekna.



Mest lesið


Fleiri fréttir

Sjá meira


×

Mest lesið