Takmörk flutningskerfisins torvelda orkusölu

Uppbygging flutningskerfis raforku hefur ekki verið í takt við uppbyggingu virkjana og er uppsett afl nú af annarri stærðargráðu en flutningsgeta milli landshluta. Frekari uppbygging virkjanakerfisins mun gera þessa stöðu enn viðkvæmari. Þetta er meðal þess sem fram kom í erindi Óla Grétars Blöndal Sveinssonar, framkvæmdastjóra þróunarsviðs Landsvirkjunar, á aðalfundi Samorku.

Óli Grétar sagði að dæmi væru um að samningar um orkusölu hefðu ekki náð fram að ganga vegna takmarkana í flutningskerfinu. Afhending 10 megavatta (MW) eða meiri orku er nú einungis möguleg í tveimur landshlutum, þ.e. Suðvestanlands og á hluta af Norðurlandi vestra. Að sögn Óla Grétars gera þessar takmarkanir nýja samninga um orkusölu erfiða.

Þá væru þegar virkjaðar auðlindir ekki nýttar til fulls vegna takmarkana í flutningskerfinu, en að sögn Óla Grétars takmarkar flutningskerfið vinnslugetu Landsvirkjunar um sem nemur um 100 gígavattstundum (GWh) á ári. Loks torveldar þessi staða þróun nýrra virkjunarkosta, enda óvissa um flutning orkunnar frá virkjunum.

Stór erlend fjárfesting í óvissu vegna takmarkana í flutningskerfinu

„Raforkuþörf Eyjafjarðar er um 100 megavött (MW) í dag og fer vaxandi. Framleidd eru 8 MW á svæðinu og nauðsyn flutnings raforku á svæðið er æpandi,“ sagði Bjarni Th. Bjarnason, sveitarstjóri í Dalvíkurbyggð, á aðalfundi Samorku í dag.

Bjarni greindi m.a. frá erlendum aðila sem óskar eftir 10 MW í atvinnuskapandi fjárfestingu í Dalvíkurbyggð, sem skapa myndi um 120 ný störf og umtalsverðar tekjur fyrir sveitarfélagið og þjóðfélagið í heild. Óvissa er um verkefnið vegna takmarkana í flutningskerfi raforku. 

Værukærir stjórnmálamenn sofa á verðinum

Bjarni sagði öfgahópa ekki mega stöðva uppbyggingu flutningskerfis raforku. Værukærir stjórnmálamenn, sveitarstjórnarfólk og hagsmunaaðilar væru sofandi á verðinum. Eyfirðingar og nærsveitafólk, sveitarstjórnarfólk, alþingismenn, embættisfólk, hagsmunaaðilar og landeigendur yrðu að leysa þetta mál sem þyldi enga bið.