Biggi Lögga hitti dreng með kannabisolíu

Birgir Örn Guðjónsson, betur þekktur sem Biggi Lögga, segist hafa séð margar skaðlegar afleiðingar af notkun kannabisefna. Þetta kemur fram í skrifum hans á Facebook-síðu hans, en hann ritaði um málið í dag.

„Í gær ræddi ég við dreng sem var með stóra krukku af einhverju sem hann kallaði kannabisolíu," segir Biggi og heldur áfram:

„Þetta var einhverskonar þykkni, búið til úr kanabis og minnti mann á grænt illa lyktandi hnetusmjör. Hann útskýrði fyrir mér hvernig þetta væri gert og hvernig þetta væri notað. Hann sagði þetta „algjöra snilld“ og að „allir væru að gera þetta núna". Síðan sagði hann mér að hann hefði lært að gera þetta í íslenskum fréttaþætti."

Biggi segist skilja vel umræðuna um lögleiðingu kannabiss. En hann virðist samt sem áður mótfallinn henni, án þess að segja það hreint út. „Sama hvað hver segir um skaðleysi kannabisefna þá hef ég bara persónulega séð of margar skaðlega afleiðingar. Það sem ég óttast einna mest í þessari umræðu allri er upphafning þessara efna og viðhorf samfélagsins til þeirra. Það er eitt að vilja hjálpa fíklum í stað þess að fangelsa, en það er annað að vilja framleiða þá."