Síminn eflir 4G þjónustu sína

Síminn hefur eflt 4G farsíma senda sína svo þeir ná nú til 75% landsmanna. Sendarnir ná nú 150 megabætum á sekúndu samanborið við 100 megabæt á sekúndu áður.

„Nýjasta uppfærsla sendanna tryggir þennan mikla hraða á sendum Símans," segir Gunnhildur Arna Gunnarsdóttir, upplýsingafulltrúi Símans, og bætir við að nýustu snjallsímarnir styðji þennan aukna hraða.

Síminn stefnir á frekari uppbyggingu 4G senda úti á landi, þar eru Siglufjörður og Húsavík næst á dagskrá en einnig er uppsetning 4G á Flúðum í undirbúningi.

Tækni farsímakerfa er ólík þeirri á fastanetinu að því leyti að hraðinn deilist á milli fjölda notenda hverju sinni segir í tilkynningu frá Símanum. „Það skiptir því öllu að byggja rétt upp og með öflugum sendum svo hraðinn verði sem allra mestur fyrir viðskiptavini.“