„Fjármálaunglingur“ hefur alþjóðlega viku fjármálalæsis

Alþjóðleg vika fjármálalæsis hófst formlega í morgun þegar Máni Mar Steinbjörnsson, „fjármálaunglingurinn“ úr sjónvarpsþáttunum „Ferð til fjár“ hringdi inn opnun markaða í Kauphöll Íslands.

Alþjóðlega fjármálalæsisvikan er haldin er í yfir eitt hundrað með það markmið að vekja ungt fólk til umhugsunar um  fjármál sín og gefur þeim tól og tæki til að móta eigin framtíð.

Alþjóðlega fjármálalæsisvikan er haldin að frumkvæði samtakanna Child and Youth Finance International. Þetta er í fjórða sinn sem hún er haldin á alþjóðavísu, en í annað sinn sem Ísland tekur þátt.

Fjölbreytt dagskrá verður hér á landi í vikunni. Á miðvikudaginn verður ráðstefna í Háskólanum í Reykjavík í hádeginu miðvikudaginn 11. mars þar sem öll erindi verða innan við fimm mínútur.

Meðal þeirra sem halda erindi verða Bjarni Benediktsson fjármálaráðherra sem segir frá fjármálalæsi, Jón Þór Sturluson, aðstoðarforstjóri Fjármálaeftirlitsins, sem fræðir fundargesti um hvort lottó sé góð fjárfesting og Lúðvík Elíasson sérfræðingur hjá Seðlabanka Íslands sem hyggst segja frá virði peninga, verðlagi og verðtryggingu.