Áfram hrynur gengi hlutabréfa í Kína

Hrun á gengi hlutabréfa í Kína á mánudag var það mesta í átta ár, eða frá í febrúar 2007. Gengið hélt svo áfram að lækka í gær. Wall Street Journal segir að hundruð milljarða dollarar hafi hreinlega þurrkast út. Efasemdir séu um aðgerðir stjórnvalda í Kína til þess að virkja markaðinn.

Sjanghaí-úrvalsvísitalan, þar sem stærstu fyrirtæki í Kína eru skráð, féll um 8,5 prósent á mánudaginn og var mesta fallið síðustu tvo klukkutímana sem viðskipti fóru fram. Vísitalan lækkaði svo aftur um 1,7 prósent daginn eftir. Shenzhen-vísitalan féll um sjö prósent og hefur fallið um 31 prósent frá því að hún náði hámarki um miðbik júnímánaðar. Vísitalan lækkaði svo um 2,2 prósent í gær.

Mikil lækkun hefur verið á hlutabréfum í Kína í sumar. CNN segir að fyrstu merki um vandræði hafi birst í júní, eftir miklar hækkanir á tólf mánaða tímabili þar áður. CNN segir að hlutabréfaverðið hafi þá lækkað hratt en stjórnvöld gripu til ráðstafana til að skapa ró á mörkuðum.

Talsmenn kínverskra stjórnvalda sögðu á mánudagskvöld að ríkissjóður myndi auka kaup á bréfum á hlutabréfamarkaðnum. Þannig myndi kínverska ríkið sinna þeim skyldum sem það hefði til þess að skapa stöðugleika á markaðnum.

Wall Street Journal segir aftur á móti að lækkunin á mánudag bendi til þess að fjárfestar hafi ekki trú á markaðnum eða getu stjórnvalda til að stýra honum.

Wall Street Journal segir að hlutabréfamarkaðir í Kína flökti mikið og ríkisafskipti af markaðnum hafi stundum endað með því að mikið framboð hafi skapast og markaðurinn verið í ládeyðu í langan tíma.

Hæst settu embættismenn í Kína munu næstu dagana hittast í bænum Bedaihe þar sem þeir munu meðal annars ræða til hvaða ráða þeir geti gripið til þess að stuðla að jafnvægi á hlutabréfamarkaðnum og koma í veg fyrir að vandamálin á mörkuðum smitist yfir á önnur svið í hagkerfinu.

Málið er stjórnvöldum mjög hugleikið því þau vilja að hlutabréfamarkaðir séu raunhæf leið fyrir fyrirtækin til þess að safna fjármagni. Þau geti þannig dregið úr þörf sinni fyrir lánsfé frá ríkisreknum bönkum.