Biðja til almættisins að Katrín sigrist á áfallinu

Vinir og aðstandendur Katrínar Bjarkar Guðjónsdóttur, 22 ára stúlku frá Flateyri, hafa stofnað styrktarsjóð henni til stuðnings en Katrín, þrátt fyrir ungan aldur, fékk á dögunum sína aðra heilablæðingu.

Á síðu sem stofnuð hefur verið um söfnunarsjóðinn er saga Katrínar rakin en fyrri heilablæðinguna fékk hún undir lok síðasta árs. Blæðingin hafði í för með sér afar langa og mikla endurhæfingu - þannig að „henni var kippt út úr hringðu lífsins.“

„Hún hefur notið rækilegs stuðnings foreldra sinna, Bjarnheiðar Jónu Ívarsdóttur og Guðjóns Guðmundssonar frá Flateyri. Unnusti hennar Ásgeir Gíslason hefur staðið vaktina með Katrínu á sérlega aðdáunarverðan hátt, sem og fjölskylda hans frá Ísafirði. Systur hennar og fjölskyldur þeirra hafa einnig tekið mikinn þátt í þessu ferli öllu, sem og fjölmargir aðrir velunnarar.”

Allt gekk vonum framar og frá því fyrir áramót og fram til 14. júní hafði endurhæfing Katrínar gengið vel að sögn aðstandenda. „Því var áfallið þann dag afar mikið, þegar flytja þurfti hana með sjúkraflugi suður eftir aðra heilablæðingu. Aðgerð var gerð á henni sem tókst vel að sögn lækna. Fjölskylda hennar og tengdafólk með unnusta hennar, í broddi fylkingar hafa verið nær samfellt við hlið hennar þennan tíma,” segir á síðunni. 

Fyrir 6 vikum fékk ég heilablæðingu. Hún var fljót að ganga til baka og eftir viku var ég útskrifuð af sjúkrahúsinu og á...

Posted by Katrín Björk Guðjónsdóttir on Thursday, 1 January 2015

Katrín var síðar flutt af gjörgæslu yfir á almenna deild á Landspítalanum, þar sem hún dvelur nú. „Því miður er ekki ólíklegt að enn geti orðið sveiflur á líðan hennar, enda er hún enn mikið veik og með takmarkaða tjáningu,“ segir á síðunni en þó er bætt við að læknar á spítalanum hafi bent á mjög mörg tilvik um álíka veikindi svona ungs fólks. „Þar sem unnt var að sigrast á álíka áfalli, með þrotlausri vinnu og endurhæfingu, á það trúum við. Um það biðjum við til almættisins, að Katrín verði í þeim hópi.“ Aðstandendur söfnunarinnar biðja alla þá sem eru aflögufærir að leggja fjölskyldunni lið og aðstoða þannig við endurhæfingu Katrínar með frjálsum framlögum. Styrktarreikningur hefur reikningsnúmerið 0515-14-410407 og kennitöluna 470515-1710.