60 kílómetrar af Glamour komið í verslanir

365 hefur samið við Odda um prentun á tímaritinu Glamour, sem kemur út mánaðarlega. Tímaritið er eitt af vinsælustu lífstílstímaritum fyrir konur í heiminum og þetta er 17. erlenda útgáfa þess. 365 gefur tímaritið út í samstarfi við Condé Nast, sem er til dæmis með Vogue, Vanity Fair og GQ á sínum snærum. Þetta kemur fram í tilkynningu frá Glamour.

„Við erum þrælmontin af þessu verkefni og umfangið er allnokkuð. Glamour er mánaðarlega prentað á pappírsrúllur, sem eru samtals um 60 kílómetra langar, yfir 1 metra breiðar og vega 3,6 tonn," segir Rúnar Höskuldsson, deildarstjóri hjá Odda.

„Condé Nast bætist nú í fallega flóru 3.500 viðskiptavina Odda, sem í prentverki spannar allt frá Forlaginu, KSÍ og Vodafone til Facebook, Nike og Smithsonian. Condé Nast gerir strangar kröfur um gæði og umhverfisvæn vinnubrögð. Prentsmiðja okkar er umhverfisvottuð og pappírinn þar kemur úr nytjaskógum í Finnlandi og Svíþjóð. Þar er lögbundið nýtingarhlutfall skóga svo hátt, að fyrir hvert tré sem nýtt er til pappírs- eða timburframleiðslu, þá eru gróðursett 4-5 ný tré,“ bætir Rúnar við.

Sævar Freyr Þráinsson, forstjóri 365, segist ánægður með útkomuna, fyrstu tvö blöðin hafi svo sannarlega farið fram úr hans björtustu vonum. Efnið sé spennandi, glæsilega upp sett greinilegt að vandað sé til verka.

„Það er áberandi hvað áferðin er góð, pappírinn flottur og prentunin vönduð. Conde Nast fylgjast með hverju skrefi sem við tökum og þeir eru ánægðir með afraksturinn. Við vonum að lesendur séu það líka,“ segir Sævar Freyr.

Annað tölublað íslenska Glamour er nú komið í verslanir og fjallar meðal annars um strauma og stefnur í fatnaði, fylgihlutum, fegurð, heimilum, hönnun, mat, heilsu, samböndum, kynlífi og ferðalögum.

Forsíðuna prýðir fyrirsætan Heather Marks í glæsilegum tískuþætti eftir ljósmyndarann Silju Magg. Heather hefur verið á forsíðum blaða á borð við Elle, Marie Claire og Harpers Bazaar, ásamt því að starfa fyrir Chanel, Proenza Schouler og Marc Jacobs.