Eygló Ósk bætti einnig Norðurlandametið í morgun

Eygló Ósk Gústafsdóttir bætti ekki aðeins Íslandsmetið sitt í 200 metra baksundi á HM í Kazan í morgun því hún átti einnig Norðurlandametið sem féll því á sama tíma.

Eygló Ósk Gústafsdóttir kom í mark í sundinu á 2.09.16 mínútum og varð í fjórða sæti í undanrásum. Eygló Ósk mun synda í undanúrslitum seinna í dag.

Þetta er í þriðja sinn sem Eygló Ósk bætir Norðurlandametið á þessu ári. Hún eignaðist það fryst með því að synda á 2.09.86 mínútum á Opna danska meistaramótinu í Esbjerg í mars en bætti það síðan með því að synda á 2.09.36 mínútum á Íslandsmeistaramótinu í Laugardalslaug í apríl.

Eygló Ósk náði fyrst íslenskra íþróttamanna A-lágmarki fyrir Ólympíuleikana í Ríó 2016 þegar hún bætti metin í 200 metra baksundinu í vor.

Það verður spennandi að fylgjast með Eygló Ósk í undanúrslitasundinu seinna í dag en þar á hún möguleika á því að verða aðeins önnur íslenskra kvenna til að komast í úrslit á HM í 50 metra laug.

Eygló Ósk syndir í seinni riðlinum þar sem hin ungverska Katinka Hosszu er líka en hún náði bestum tíma í undanrásunum í morgun. Eygló Ósk verður á þriðju braut með Hosszu öðrum megin við sig en hinum megin syndir síðan hin þýska Lisa Graf.