Ákærðir fyrir fjárdrátt vegna innflutnings á sjö þúsund flöskum af sterku áfengi

Sérstakur saksóknari hefur gefið út ákæru á hendur Hendriki Birni Hermannssyni og Halldóri Leví Björnssyni fyrir fjársvik í tengslum við innflutning af 7.224 0,7 lítra flöskum af 37,5% sterku áfengi.

Hendrik er, líkt og Stundin greinir frá, annar eigandi Players og var árið 2008 dæmdur til að greiða 77 milljóna króna sekt vegna svika á vörslusköttum. Halldór Leví er fyrrum aðstoðarmaður Bjarkar Guðjónsdóttur, þingmanns Sjálfstæðisflokksins.

Þá var Halldór Leví sakaður um fjárdrátt úr sjóðum Þroskahjálpar á Suðurnesjum árið 2011 en hann hafði verið formaður samtakanna samkvæmt frétt DV. Lögreglurannsókn á ósamræmi í bókhaldi félagsins var hætt eftir að Halldór endurgreiddi Þroskahjálp þá upphæð sem stjórn samtakanna taldi hann hafa dregið að sér.

Sagðir hafa komið sér hjá greiðslu aðflutningsgjalda

Halldóri og Hendrik er gefið að sök að hafa með blekkingum fengið greiðslufrest á 26 milljóna króna kröfu embættis Tollstjóra. Þeir hafi nýtt sér heimild félagsins Valís ehf. til að fá frest á greiðslu aðflutningsgjalda þar sem félagið uppfyllti skilyrði laga um slíkt þar sem Valís hafi verið skuldlaus við ríkissjóð og áður flutt áfengi til landsins.



Samkvæmt ákærunni pantaði Halldór vínflöskurnar sjö þúsund frá Bretlandi í gegnum félagið Vínheima, sem Halldór á, í mars árið 2012. Fyrir þær hafi verið greitt með fjármunum frá Hendriki. Í ákærunni er Halldór sagður hafa vitað eða hafi hlotið að vita að áfengið yrði ekki nýtt í þágu Vínheima.

Þann 12. apríl er Halldór sagður hafa farið fram á að pöntunin yrði færð yfir á félagið Valís, hjá breska vínsalanum. Hann hafi svo sent Eimskipum, sem flutti áfengið til landsins, reikning þann 17. apríl þar sem Valís var skráður kaupandi áfengisins. Fyrr um daginn hafði Halldór keypt allt hlutafé í Valís á 360 þúsund krónur.

Eftir að áfengið var komi til landsins er Hendrik sagður hafa selt áfengið í eigin þágu til veitingastaða auk þess að hafa látið Halldór fá hluta áfengisins án þess að greitt væri fyrir. Því hafi ekkert af andvirði áfengisins runnið til Valís eða upp í skuld félagsins við Tollstjóra vegna aðflutningsgjalda.

Engin starfsemi í Valís eftir áfengiskaupin

Engin starfsemi var í Valís eftir að Halldór keypti félagið samkvæmt ákærunni. Engar fjármunafærslur hafi átt sér stað, ekkert bókhald verið fært og skattframtölum hafi ekki verið skilað. Valís var lýst gjaldþrota í janúar 2013. Tollstjóri lýsti 38,7 milljóna króna kröfu í þrotabúið. Skiptum á búinu er ekki lokið en ólíklegt er talið að nokkuð fáist upp í kröfu Tollstjóra þar sem eignir í búinu séu litlar sem engar.



Þingfesting var í málinu fyrir Héraðsdómi Reykjavíkur fyrr í dag. Sérstakur saksóknari fer frá á Halldór og Hendrik verði dæmdir til refsingar og til greiðslu alls sakarkostnaðar.