Brotalöm í málefnum útsendra starfsmanna

Það virðist vera brotalöm á því hvernig íslensk sjávarútvegsfyrirtæki hafa haldið utan um málefni starfsmanna sem eru sendir út til að vinna í sjávarútvegi og -iðnaði. Þetta kemur fram í nýlegri eigindlegri rannsókn Sigrúnar Eddu Eðvarðsdóttur í meistaranámi við viðskiptafræðideild Háskóla Íslands.

Sigrún bendir á að þegar þjálfa á starfsmann og búa undir starfsdvöl í erlendu ríki sé nauðsynlegt að taka hæfileika og persónuleika hans með í myndina. Það þurfi að miðla upplýsingum til viðkomandi um landið. Þetta geti verið hagnýtar upplýsingar um aðbúnað og svæðið sjálft sem viðkomandi ætlar að búa á, um pólitískt, félagslegt og menningarlegt umhverfi.

Aðlagist starfsmaðurinn eða fjölskylda hans ekki, geti það haft alvarlegar afleiðingar, bæði fyrir starfsmanninn og fyrirtækið sem á í hlut. Það geti valdið kvíða hjá starfsmanninum, slakri frammistöðu og ótímabærri heimkomu.

Í útsendum starfsmanni felst mikil fjárfesting og það er mikilvægt að fyrirtækin séu meðvituð um að sú þekking og reynsla sem hann öðlast nýtist í þágu þess.

Í rannsókn Sigrúnar kom fram að íslensku fyrirtækin misstu í flestum tilvikum starfsmennina frá sér við heimkomu og var engin áhersla á að halda í þá eða þekkingu þeirra. Margir héldu til starfa á nýjum vettvangi og hafði reynslan sem starfsmennirnir öðluðust fyrst og fremst jákvæð áhrif á starfsferil viðkomandi, en ekki fyrirtækið sem fjárfesti í honum, sem missti þekkinguna frá sér.

„Það er mikilvægt fyrir íslensk fyrirtæki að vera með áætlun um það hvernig þau ætli að miðla þekkingu starfsmannsins  aftur inn í fyrirtækin og nýta í þágu þeirra,“ segir Sigrún og bendir á að í þessu liggja sóknarfæri.

Rannsóknin var unnin í samvinnu við Sjávarklasann í Reykjavík.