Grunaður um að hafa myrt klefafélaga sinn

Fyrrum hlaupari St. Louis, Miami og San Francisco í NFL-deildinni, Lawrence Phillips, er grunaður um að hafa myrt klefafélaga sinn í fangelsi í Kaliforníu.

Nú hefur verið staðfest að klefafélagi Phillips, Damion Soward, hafi verið kyrktur til dauða. Nokkuð ljóst þykir vera að Phillips hafi framið verknaðinn enda voru þeir aðeins tveir í klefanum.

Hann er að afplána rúmlega 30 ára fangelsisdóm fyrir að hafa í tvígang reynt að kyrkja kærustu sína. Hann keyrði einnig á þrjá unglinga sem voru að spila fótbolta.

Hinn látni var að afplána 82 ára dóm fyrir morð.