Drengurinn vaknaður og kominn úr öndunarvél

Yngri drengurinn sem lenti í sjálfheldu í fossi sem rennur af Reykdalsstíflu í Hafnarfirði er vaknaður. Honum hefur verið haldið sofandi í öndunarvél frá því að slysið átti sér stað. Þetta staðfestir fulltrúi Landspítalans í samtali við fréttastofu.

DV greindi fyrst frá málinu síðdegis í dag og hafði eftir ættingja drengsins. Samkvæmt upplýsingum frá spítalanum vaknaði drengurinn í dag og er hann vakandi núna. Hann er kominn úr öndunarvél en hann mun vera mjög veikburða ennþá.

Von er á frekari upplýsingum frá spítalanum og fjölskyldu drengsins.

Eldri bróðir drengsins var endurlífgaður á slysstað samkvæmt upplýsingum fréttastofu en hann var útskrifaður af spítalanum á miðvikudag. 

Uppfært klukkan 18:50

Spítalinn hefur sent frá sér tilkynningu vegna málsins en hana má lesa hér fyrir neðan.

Drengur sem verið hefur til meðferðar á Landspítala eftir alvarlegt slys í Hafnarfirði er vaknaður og á hægum batavegi. 

Drengurinn verður áfram á gjörgæsludeild við Hringbraut og mun þar fá viðeigandi stuðning og meðferð. Fjölskyldan dvelur þar hjá honum.