Marel selur hluta starfseminnar í Norwich

Marel hefur selt starfsemi sína í háhraða skurðartækni (High Speed Slicing) sem staðsett er í Norwich, Bretlandi. Aðrir vöruflokkar sem heyra undir starfsemi félagsins í Norwich eru ekki hluti af sölunni. Það er mótunarvélar (frozen portioning) og þjarkar (robotics), en þeir vöruflokkar falla undir kjarnastarfsemi Marel og styðja við vöruframboð og stefnu félagsins.

Í tilkynningu til Kauphallar segir að salan sé mikilvægt skref í áætluninni um einfaldara og skilvirkara Marel og styður þá stefnu félagsins að endurskoða vöruframboð með það að markmiði að auka slagkraftinn á þeim sviðum þar sem félagið hefur skýrt samkeppnisforskot og sterka markaðsstöðu. Starfsemin í háhraðaskurðartækni veltir árlega um 10 milljónum evra, eða um 1,5 milljarði króna.

Kaupandinn er Middleby Corporation og er áætlað að gengið verði frá sölunni að fullu fyrir lok fyrsta ársfjórðungs 2015. Middleby er leiðtogi á sviði tæknibúnaðar fyrir matvælaþjónustuiðnaðinn og þróar og framleiðir búnað og tæki sem notuð eru í matvælaþjónustu, mætvælavinnslu og heimaeldhúsum.