Flugslysið á Jövuhafi rakið til bilaðs búnaðar og mistaka flugmanna

Flugslysið á Jövuhafi í desember á síðasta ári er rakið til bilaðs búnaðar og mistaka flugmanna. Vél AirAsia var á leið frá Surabaya til Singapúr þegar slysið varð, en 162 manns fórust.

Skýrsla indónesískrar rannsóknarnefndar var birt í morgun. Þar kemur fram að tölvustýring vélarinnar hafi ekki verið í lagi og verið það um langt skeið. Hún hafði raunar bilað 23 sinnum síðasta árið sem vélin var í notkun og flugritar vélarinnar sýna að tölvan hafi bilað fjórum sinnum í fluginu.

Þegar búnaðurinn bilaði í fjórða sinnið reyndu flugmennirnir að taka stjórnina sjálfir og skömmu síðar ofreis vélin með þeim afleiðingum að hún hrapaði í hafið.

Stjórnstöð missti samband við vélina 40 mínútum eftir flugtak. Vélin var af gerðinni Airbus A320-200.