Bóluefni gegn flensu á þrotum

Allt bóluefni gegn árlegri inflúensu er uppurið í landinu, að því er fram kemur á vef Landlæknis.

„Mikil ásókn hefur verið í bólusetningu gegn árlegri inflúensu á undanförnum vikum,“ segir á vefnum, en frá því í haust hafi 60 þúsund skammtar verið seldir.

Fram kemur að á undanförnum árum hafi um 50 til 55 þúsund skammtar verið seldir á hverjum vetri, nema veturinn 2013 til 2014 en þá hafi selst rúmlega 60 þúsund skammtar.

„Um 5.000 skammtar verða nú keyptir aukalega af inflúensubóluefninu en á þessari stundu er ekki vitað hvenær það verður tilbúið til afhendingar. Það verður auglýst um leið og það er vitað,“ segir á vef Landlæknisembættisins.

Fram kemur að inflúensan hafi ekki enn greinst hér á landi í vetur en fregnir af einstaka tilfellum hafi borist frá nálægum löndum.

„Virkni bóluefna við að koma í veg fyrir veikindi af völdum inflúensuveirunnar er breytileg milli ára, en á þessari stundu er ekki vitað hver virknin verður í ár.“