Sýrlensku flóttamennirnir koma fyrir áramót

Sýrlensku flóttamennirnir 55, sem boðið var að koma til Íslands, hafa þegið boðið og eru tilbúnir til að koma til landsins fyrir áramót. Þetta kemur fram í stöðuuppfærslu Eyglóar Harðardóttur, félags- og húsnæðismálaráðherra, á Facebook.

„Ég er mjög ánægð með að þessum áfanga sé náð og við hlökkum til að taka á móti þessum hóp," segir Eygló Harðardóttir í samtali við Vísi. „Við erum mjög þakklát fyrir að allir hafi samþykkt að koma til okkar. Við höldum svo áfram vinnunni, í samstarfi við heimasveitarfélögin sem boðist hafa að taka á móti fyrstu hópunum. Markmiðið er svo að taka vel á móti þessu fólki, bjóða það velkomið og hjálpa því að aðlagast nýjum og breyttum heimkynnum.“

Fyrir viku var samningur undirritaður milli ríkissins og sveitarfélaganna sem ætla að taka á móti flóttamönnunum. Flestir flóttamannanna, 23 talsins, munu fara til Akureyrar en Hafnarfjörður tekur á móti sautján. Fimmtán koma til með að búa í Kópavogi.

Gleðifréttir. Þeir 55 sýrlensku flóttamenn sem fengu boð um að koma til Íslands hafa þegið það og eru tilbúnir að ferðast fyrir áramót :)

Posted by Eygló Harðardóttir on Wednesday, 2 December 2015