Risatap á rekstri FIFA

Árið 2015 hefur verið ein sorgarsaga fyrir Alþjóða knattspyrnusambandið, FIFA, og það mun enda á neikvæðum nótum.

Tveir háttsettir menn innan FIFA voru handteknir í morgun og nú er að koma í ljós að sambandið tapaði svakalegum peningum á árinu.

FIFA mun tilkynna um rúmlega 13 milljarða króna tap á árinu sem fjöldi FIFA-manna voru handteknir, forsetanum var vikið frá og endalausar sögur um spillingu voru í umræðunni.

FIFA er að funda núna í Zurich um leiðir til þess að bæta sambandið og ímynd þess.

Bandarísk yfirvöld hafa þegar ákært fjórtán meðlimi FIFA á árinu og fleiri gætu fengið ákæru. Nýr forseti sambandsins verður kosinn í lok febrúar.