Slátrun á hrossum hefur verið í algjöru lágmarki síðustu mánuði eftir að Rússlandsmarkaðir lokuðust á árinu.

Sláturleyfishafar geta því ekki tekið inn hross til slátrunar og sitja margir bændur uppi með hross sem þeir vonuðust eftir að geta losað sig við. Ágúst Andrésson, forstöðumaður kjötafurðastöðvar KS, segir fáa vera að slátra hrossum í einhverju magni þessa dagana.

Ágúst segir markaði í Rússlandi hafa verið einkar hagfellda fyrir útflutning á hrossum. Bæði hafa þeir markaðir tekið við öllu kjöti af skrokknum og gott verð fengist. Síðustu mánuði hefur síðan lítið sem ekkert komist á þá markaði.

„Því eru menn aðeins að vinna inn á lítinn innanlandsmarkað,“ segir Ágúst. „Við höfum verið að leita fyrir okkur á öðrum mörkuðum, svo sem í Japan, og það gæti farið að gefa góða raun. Hins vegar er sá markaður ekki fyrir allt kjöt af hrossi og því þyrftum við að komast á Rússamarkað áður en langt um líður.“ 

Nú fer í hönd tími þar sem hrossabændur fara að gefa stóðum sínum og því er ærinn kostnaður í að halda hrossum á fóðrum sem bíða slátrunar. Vitað er í sláturhúsi B. Jensen í Eyjafirði að hrossabændur sumir hverjir séu að bíða með hross sem þeir pöntuðu inn til slátrunar í júní í sumar. Um 9.300 hrossum var slátrað á landinu í fyrra og ljóst er að sú tala verður mun lægri á þessu ári. Rúmlega 70.000 hross eru til í landinu hverju sinni. Aukinn fjöldi hrossa mun auka heyþörf hrossabænda til muna. 

„Nú verðum við að treysta á að sláturleyfishafar finni markað fyrir afurðina. Það er bagalegt í þessu árferði nú að geta ekki afsett hross. Nú eru bændur komnir í þá stöðu að þurfa að gefa hrossum á útigang og það kostar peninga á meðan,“ segir Sveinn Steinarsson, formaður félags hrossabænda.