Piltur á menntaskólaaldri hefur verið sýknaður af ákæru um kynferðisbrot gegn fjórtán ára stúlku með þroskaskerðingu á Vestfjörðum. Var honum gefið að sök að hafa látið hana fróa sér og haft við hana samræði án þess að gæta nægjanlegrar varúðar um aldur stúlkunnar. Héraðsdómur Vestfjarða kvað upp dóm sinn í gær.

Móðir brotaþola lagði fram kæru fyrir hönd ólögráða dóttur sinnar vegna aburðarins sem átti sér stað 30. maí árið 2014. Fyrir liggur að stúlkan hafði samband við piltinn að fyrra bragði á Facebook og spurt hann hvort hún mætti koma með honum á rúntinn. Hann var þá akandi um með vinum sínum. Hann hafi sagt henni að það kostaði eitthvað. Kom hann í heimsókn til hennar þar sem óumdeilt er að fyrrnefndir atburðir áttu sér stað. Fyrir dómi var deilt um hvort pilturinn hefði gert sér grein fyrir að stúlkan var ekki orðin fimmtán ára og því ólögráða.

Pilturinn sagðist ekki hafa vitað um aldur stúlkunnar annað en það að hún væri fædd árið 1999. Hann hefði spurt hana út í aldur hennar þegar hann kom í heimsókn og hún sagt honum að hún væri 15 ára. Var framburður hans metinn trúverðugur þrátt fyrir að vera að litlu leyti breyttur frá skýrslutöku hjá lögreglu.

Með slakari dómgreind en jafnaldrar hennar

Stúlkan sagðist hins vegar ekki hafa sagt ákærða að hún væri orðin 15 ára. Hún taldi hann hafa verið meðvitaðan um að hún væri fædd árið 1999 auk þess sem upplýsingar um aldur hennar, þ.e. fæðingardag, hefði verið að finna á Facebook. Þessu neitaði pilturinn og benti á að slíkum upplýsingum mætti hæglega breyta eftir á.

Fyrir liggur að stúlkan hefur verið greind með væga þroskaskerðingu. Barnalæknir hjá Greiningar- og ráðgjafarstöð ríkisins sagði að reikna mætti með því að dómgreind hennar væri slakari en hjá jafnöldrum. Auðveldara væri að hafa áhrif á hana auk þess sem hún sé með athyglisbrest. Sennilega gerðu ekki allir sér grein fyrir því eftir stutt spjall að stúlkan væri með þroskaskerðingu en það færi eftir umræðuefninu.

Vinkona stúlkunnar, sem hafði verið í heimsókn hjá henni áður en pilturinn mætti, sagði stúlkuna hafa verið „geðveikt“ ánægða og brosandi þegar hún kom aftur og spennt að fá að fara á rúntinn með ákærða. Þær væru ekki vinkonur í dag en þó engin illindi þeirra á milli. Þá sagði vinkonan að stúlkan hefði sagst hafa sagt ákærða að hún væri aðeins eldri en hún væri í raun og veru. Var framburður vitnisins metinn trúverðugur. Þá báru vinir piltsins að hann hefði sagt þeim að stúlkan hefði sagst vera orðin fimmtán ára.

Varð það niðurstaða dómsins að nógu mikill vafi væri uppi um að pilturinn hefði gerst sekur um kynferðisbrotið sem hann var ákærður fyrir. Ekki væri komin fram lögfull sönnun og var hann því sýknaður.

Dóminn í heild sinni má lesa hér.