Heimsóknir barna á Landspítalann takmarkaðar

Vegna RS-veiru sýkingarhættu eru allar heimsóknir barna yngri en tólf ára bannaðar á þremur deildum Landspítalans. Um er að ræða vökudeild, fæðingarvakt og meðgöngu- og sængurlegudeild. Þá er þess óskað að heimsóknir annarra á fyrrnefndar deildir séu takmarkaðar.

Í frétt á vef Landspítalans kemur fram að gripið sé til ráðstafana á borð við þessa þegar RS-vírus greinist líkt og tilfellið sé nú. Er fólk beðið um að hafa samband við starfsfólk viðkomandi deilda hafi það spurningar.

Á Doktor.is kemur fram að RS-veiran valdi sýkingu í efri öndunarfærum. Þær séu oftast nær einkennalitlar og algengast að sjá hjá eldri börnum og fullorðnum. Hins vegra getur hún einnig valdið sýkingu í neðri hluta öndunarfæra, s.s. lungnabólgu, berkjabólgu og barkabólgu. Þessar sýkingar séu alvarlegri og algengast að finna þær hjá ungum börnum. Þær eru algengastar á veturna og vorin.