111 ára sögu Símaskráarinnar lýkur á næsta ári

Símaskráin verður gefin út í síðasta sinn á næsta ári en þetta kemur fram í tilkynningu frá fyrirtækinu Já sem hefur gefið skrána út.

Í tilefni af því að um síðustu símaskrána verður að ræða mun sérstök hátíðarútgáfa af Símaskránni koma út og hefur sagnfræðingurinn Stefán Pálsson fengið það verkefni að skrá sögu hennar sem telur þá 111 ár. Þá verður hönnun forsíðunnar í höndum Godds, prófessors við hönnunar-og arkitektúrdeild Listaháskóla Íslands.

Fyrsta Símaskráin kom út þann 15. ágúst árið 1905 en ákvörðunin nú um að hætta útgáfunni er tekin í takt við nýja tíma, er haft eftir Margréti Gunnlaugsdóttur, viðskipta-og þróunarstjóra Já, í tilkynningu.

Þá er haft eftir Stefáni Pálssyni að varla sé hægt að hugsa sér hversdagslegri hlut en Símaskrána enda hafi hún verið til á hverju heimili síðan maður man eftir sér.

„En það er einmitt svo skemmtilegt að skoða þessa hversdagslegu hluti í nærumhverfinu og uppgötva að þeir eiga sér líka sögu og hafa þróast í takt við samfélagið. Símaskráin hefur komið út á hverju ári í meira en öld og er þess vegar líka samfélagsspegill. Ég hlakka til að kafa oní þessa sögu og skoða gamlar skrár með hagnýtum leiðbeiningum um allt frá notkun símtækja yfir í hvernig bregðast skuli við kjarnorkustyrjöld,“ segir Stefán.

Það er þó rétt að taka fram að upplýsingar um símanúmer einstaklinga og fyrirtækja verða áfram aðgengilegar á heimasíðunni já.is, í Já-appinu sem og í símanúmeri 1818.