Rauði krossinn og Eimskip endurnýja samning til fimm ára

Eimskip, Eimskip Flytjandi og Rauði Krossinn á Íslandi hafa undirritað samning um áframhaldandi samstarf á sviði fatasöfnunar og flutninga. Frá árinu 2009 hefur Eimskip stutt  við mannúðarstarf Rauða krossins með aðstoð við fatasöfnun á yfir 80 afgreiðslustöðum Flytjanda um land allt og flutninga á notuðum fatnaði og vefnaðarvöru til Evrópu. Alls hefur Eimskip flutt um 10 þúsund tonn af fatnaði fyrir Rauða krossinn.

Einnig er fatasöfnunin mikilvæg fjáröflun til mannúðarstarfs, þar sem hluti fatnaðar er seldur áfram eða endurnýttur á annan hátt.

Sveinn Kristinsson, formaður Rauða krossins á Íslandi, er hæstánægður með stuðning Eimskips og að farsælt samstarf haldi áfram, en samningurinn er til fimm ára:

„Stuðningur Eimskips er Rauða krossinum ómetanlegur og gerir okkur kleift að halda úti metnaðarfullum verkefnum á sviði fatasöfnunar, fataúthlutunar og dreifingar. Þetta samstarf hefur verið til fyrirmyndar í gegnum árin og það er einstaklega jákvætt og hvetjandi fyrir stöndug fyrirtæki að sýna samfélagslega ábyrgð með þessum hætti,“ er haft eftir Sveini í tilkynningu um samninginn.

Gylfi Sigfússon forstjóri skrifaði undir samninginn fyrir hönd Eimskipafélagsins. Hann fagnaði einnig endurnýjun samningsins og sagði við undirritunina að það skipti félagið afar miklu máli að vera gildandi á sviði mannúðarmála og ekki síst á þeim tímum sem tímum sem við nú lifum á. Mikil þörf er fyrir hjálp samtaka eins og Rauða krossins víðs vegar um heim og sé það Eimskipafélaginu bæði ljúft og skylt að koma að slíku starfi.