Vitni í Stím-málinu: „Er þetta ekki 2008 í hnotskurn?“

Helga Hlín Hákonardóttir, sem var framkvæmdastjóri lögfræðisviðs Sögu Capital, bar vitni í Stím-málinu í Héraðsdómi Reykjavíkur í morgun.

Saga Capital var hluthafi í Stím auk þess sem bankinn lánaði félaginu einn milljarð króna til hlutabréfakaupa í FL Group og Glitni í nóvember 2007. Þá kom framkvæmdastjóri félagsins, Þórleifur Stefán Björnsson, jafnframt frá Sögu Capital en fram kom í máli Helgu í dag að Saga Capital hefði í raun ekki stýrt Stím heldur hafi félagið verið á forræði Glitnis.

Helga sagði að upphaflega átti Saga Capital að vera eini fjárfestingabankinn sem kæmi að Stím og því var ákveðið að félagið yrði vistað hjá bankanum. Strúktúr viðskiptanna breyttist hins vegar og fór það að lokum þannig að Glitnir varð stærsti hluthafi félagsins. 

Sagði Glitni hafa haft forræði yfir Stím

Þegar það hafi komið í ljós lögðu stjórnendur Sögu Capital áherslu á það að félagið yrði ekki lengur vistað hjá þeim heldur Glitni og að Þórleifi yrði að skipta út.

Aðspurð hvort að Þórleifur hafi stýrt Stím svaraði Helga því neitandi. Hún var þá spurð hver hefði stýrt félaginu.

„Öll fyrirmæli og ákvarðanataka varðandi Stím kom frá Glitni,“ en Helga gat ekki svarað því hver hjá Glitni hafi átt að fara með stjórn félagsins.

Á meðal þeirra ákvarðana sem Helga nefndi að Saga Capital hafi ekki komið að og ekki frétt um fyrr en eftir á var þátttaka Stím í hlutafjárútboði FL Group í desember 2007 og lán Glitnis til Stím fyrir hlutabréfunum í janúar 2008. 

„Þá halda menn bara áfram að skíta upp á eigið bak“

Í janúar 2008 ræddu Helga og Þórleifur þessi viðskipti í síma. Sagði Þórleifur að Glitnir hafi veitt Stím lánið með „hangandi haus.“

„Með hangandi haus, já, já. Það er svona þegar maður er búinn að skíta á sig og á góða vini sem redda manni. Það er bara, þá halda menn bara áfram að skíta upp á eigið bak,“ sagði Helga í símtalinu um lán Glitnis til Stím.

Saksóknari spurði Helgu hvað hún ætti við með þessum ummælum sínum og svaraði hún þá:

„Er þetta ekki 2008 í hnotskurn?“

Verjandi Lárusar Welding, Óttar Pálsson, spurði svo Helgu hver það væri sem væri búinn að skíta á sig og sagði Helga að væntanlega hefði það verið Stím.

Helga gat ekki svarað því hver hefði tekið ákvörðun um lán Glitnis til Stím en sagði að það hefðu komið gögn frá Glitni til Þórleifs um lántökuna. 

Sala skuldabréfsins takmarkaði óvissuna

Að sögn Helgu kallaði hún ítrekað eftir upplýsingum um stöðu Stím frá Glitni en gekk illa að fá upplýsingar. Opinberar upplýsingar gáfu þó til kynna að staða félagsins hefði versnað en hún hafði fregnir af því að félagið væri í skuldastýirngu hjá Glitni sem hefði gengið mjög vel en stýringin fólst í því að taka stöðu á móti krónunni.

Svo illa gekk hins vegar að fá upplýsingar staðfestar að Saga Capital óskaði eftir því að Glitnir myndi finna kaupanda að víkjandi skuldabréfi sem bankinn átti en Stím var útgefandi bréfsins. Bréfið var upphaflega lánssamningur milli Sögu og Stím upp á einn milljarð vegna láns bankans til félagsins í nóvember 2007.

Aðspurð sagði Helga að salan á bréfinu hefði takmarkað algera óvissu sem ríkti vegna þess þar sem Saga Capital hafði ekki fullnægjandi upplýsingar um stöðu Stím.

Fyrrverandi forstjóri Sögu Capital,  Þorvaldur Lúðvík Sigurjónsson, er ákærður fyrir hlutdeild í umboðssvikum vegna sölunnar á skuldabréfinu. Jóhannes Baldursson, fyrrverandi framkvæmdastjóri markaðsviðskipta Glitnis, er ákærður fyrir umboðssvik vegna bréfsins en einn fagfjárfestasjóða bankans keypti bréfið af Sögu.

Þá er Lárus Welding, fyrrverandi forstjóri Glitnis, einnig ákærður í málinu vegna 20 milljarða króna lánveitingar bankans til Stím í nóvember 2007. Lánið var notað til að kaupa hlutabréf af bankanum sjálfum í Glitni og FL Group.