Nær allslausar mæðgur óska eftir húsbúnaði

Erlenda konu, sem hraktist af heimili sínu vegna ofbeldis maka, vantar nær allan húsbúnað í nýja íbúð sem hún fær afhenta í desember. Hún er hér á landi ásamt sautján ára dóttur sinni, og hafa þær dvalið í Kvennaathvarfinu að undanförnu. Þær eru nánast allslausar að sögn lögmanns konunnar, Kristrúnar Elsu Harðardóttur, sem leitað hefur á náðir samfélagsmiðla til að finna mæðgunum húsgögn.

„Hún kom hingað til lands eftir að hafa kynnst erlendum manni sem býr á Íslandi, í gegnum Facebook. Nánast um leið og hún kom hingað hófst mikið andlegt ofbeldi sem síðan varð líkamlegt. Henni var varla hleypt úr húsi,“ segir Kristrún.  Aðspurð segir hún þær mæðgur hafa komið hingað til lands fyrir um einu og hálfu áru síðan. Stúlkan sé hér í skóla og að á Íslandi vilji þær vera.

Kristrún birti færslu á Facebook í dag þar sem hún óskaði eftir húsgögnum og borðbúnaði fyrir mæðgurnar. Hún segist hafa fengið góð viðbrögð við færslunni; þegar séu þær komnar með sófa, eldhúsborð og stóla. Núna hins vegar vanti rúm, borðbúnað og annað þvíumlíkt.

Hún biðlar til fólks að leggja þeim lið, en þeir sem sjá sér fært að aðstoða mæðgurnar geta sent Kristrúnu tölvupóst á netfangið kristrun@landlogmenn.is.

Uppfært kl 23.50:

Mæðgurnar eru komnar með allt það sem þær þurftu, að sögn Kristrúnar. Hún þakkar veittan stuðning.

Umbjóðandi minn, sem er erlend kona og þolandi heimilisofbeldis, hefur hrakist af heimili sínu vegna ofbeldis maka. Hún...

Posted by Kristrún Elsa Harðardóttir on 18. nóvember 2015