Þjófur handtekinn á Klambratúni eftir eftirför

Einn var handtekinn eftir að tilkynnt var um þjófnað úr bifreið við Háteigsveg í Reykjavík um kvöldmatarleytið í gær.

Húsráðendur stóðu í flutningum og komu að manninum þar sem hann var að róta í bílnum. Þjófurinn lagði á flótta en var stöðvaður á Klambratúni. Einn þeirra sem veittu þjófnum eftirför er grunaður um að hafa veitt honum áverka áður en lögreglan kom á vettvang. Sá var handtekinn en látinn laus að lokinni skýrslutöku.

Þjófurinn var fyrst færður á slysadeild til aðhlynningar en síðan vistaður í fangageymslum. Maðurinn var ölvaður að sögn lögreglu.