Magnús Ver áfrýjar til Hæstaréttar

Magnús Ver Magnússon ætlar að áfrýja dómi Héraðsdóms Reykjavíkur til Hæstaréttar. Hinn 16. október dæmdi Héraðsdómur Reykjavíkur ríkið til að greiða Magnúsi 600 þúsund krónur í miskabætur vegna rannsóknar lögreglu á meintri aðild hans að fíkniefnainnflutningi.

Mál Magnúsar snýst um tilefnislausar símhleranir og hlustanir lögreglu. Hann vonast eftir þyngri dómi. „Það er mikilvægt að ég fái nafn mitt hreinsað vegna þessa máls og að Hæstiréttur sendi skýr skilaboð um að mannréttindabrot, séu alvarleg brot.“

Tilkynning Magnúsar í heild sinni:

Að höfðu samráði við fjölskyldu mína og lögfræðinga, Ólaf Karl Eyjólfsson hdl. og Jóhann Hauk Hafstein hrl., hef ég ákveðið að áfrýja til Hæstaréttar dómi héraðsdóms í máli mínu vegna tilefnislausra símhleranna og hlustanna lögreglu. Ég vona að Hæstiréttur felli þyngri dóm og þannig standi vörð um mannréttindi í landinu. Það er mikilvægt að ég fái nafn mitt hreinsað vegna þessa máls og að Hæstiréttur sendi skýr skilaboð um að mannréttindabrot, séu alvarleg brot. Þessi málarekstur hefur tekið á mig og fjölskyldu mína, þrátt fyrir það, þá er ég þannig gerður að ég veigra mér ekki við erfiðum verkefnum og ætla því að halda þessar baráttu áfram og vonandi verður barátta mín til þess að fleiri leiti réttar síns sem brotið er á með sambærilegum hætti.