Eldur kom upp í Bjarna Sæmundssyni

Eldur kom upp í vélarrými Bjarna Sæmundssonar RE, rannsóknarskipi Hafrannsóknarstofnunar, sem er í slippnum við Reykjavíkurhöfn í þriðja tímanum í dag. Allt tiltækt slökkvilið var sent á vettvang.

Enginn starfsmaður Slippsins var í hættu, en eldurinn kom upp við logsuðu.

Þegar slökkviliðsmenn komu á vettvang var vélarrými Bjarna lokað af og sjálfvirkt slökkvikerfi sett í gang. Kerfið dælir efni inn í rýmið sem dregur úr súrefni þar og í raun kæfir eldinn.

Samkvæmt upplýsingum frá Slökkviliði höfuðborgarsvæðisins hefur kerfið virkað vel. Reykkafarar fóru inn í vélarrýmið og hefur eldurinn verið slökktur að mestu. Einhver glóð eru sögð vera eftir.

Slökkviliðsmenn eru byrjaðir að taka saman og er slökkvistarfi að mestu lokið.