Skylda að hafa áætlun gegn einelti og áreitni

Öllum vinnustöðum er skylt að gera áætlun um aðgerðir til að sporna við einelti, kynferðislegri og kynbundinni áreitni og ofbeldi. Eygló Harðardóttir, félags- og húsnæðismálaráðherra, hefur sett nýja reglugerð þess efnis.

Samkvæmt lögum um aðbúnað, hollustuhætti og öryggi á vinnustöðum er öllum vinnustöðum skylt að gera áhættumat. Í nýju reglugerðinni er með skýrum hætti kveðið á um að við gerð slíks áhættumats skuli einnig greina áhættuþætti eineltis, áreitni og ofbeldis.

Í frétt á vef velferðarráðuneytisins segir Eygló setningu reglugerðarinnar mikilvægan áfanga og vonast til að betur verði tryggt að tekið sé skipulega og faglega á ofantöldum vandamálum.