Mikið um ölvun á Airwaves

Talsverður erill var hjá lögreglunni á höfuðborgarsvæðinu í nótt vegna ölvunar. Margmenni var í miðbænum, meðal annars í tilefni Airwaves-hátíðarinnar sem náði hámarki í gærkvöld.

Óskað var eftir aðstoð lögreglu á fimmta tímanum í nótt vegna líkamsárásar á bar í miðbænum. Karlmaður á fimmtugsaldri hafi orðið fyrir árás nokkurra aðila þannig að nokkrar tennur brotnuðu í efri góm hans, að því er segir í dagbók lögreglu. Maður á þrítugsaldri var handtekinn vegna málsins og vistaður í fangageymslu.

Um fjögur leytið var lögregla og sjúkralið kölluð út vegna kvenmanns á þrítugsaldri sem taldi að sér hefði verið byrlað ólyfjan, þar sem hún ætti erfitt með andardrátt og kastaði stöðugt upp. Í dagbókinni segir að konan hafi verið að reykja kannabis og það farið illa í hana.

Á þriðja tímanum hafði lögregla afskipti af sautján ára pilti í Austurbæ þar sem hann var búinn að koma sér fyrir inni í bifreið sem hann átti ekki. Hann var undir áhrifum áfengis og sagðist ekki í nein hús að venda. Pilturinn gisti í fangaklefa en þar sem ekki náðist í forráðamenn hans var Barnavernd tilkynnt um málið.

Um kvöldmatarleyti var óskað eftir aðstoð lögreglu vegna óláta tveggja pilta í og við Kringluna. Þeir höfðu meðal annars átt að hafa ógnað lögreglu með kúbeini. Einn sextán ára piltur var handtekinn en hann var með hamar falinn innan klæða auk þess sem hann var undir áhrifum áfengis og vímuefna. Forráðamaður drengsins var fenginn til að sækja hann að skýrslutöku lokinni.

Þá var tilkynnt um þjófnað í Smáralind um klukkan fimm í gær.Öryggisverðir hugðust stöðva þjófinn, karlmann á þrítugsaldri, en sá ógnaði þeim með hníf. Lögregla handtók hann skammt frá verslunarmiðstöðinni. Í dagbók lögreglu segir að hann hafi verið undir áhrifum fíkniefna auk þess sem fíkniefni fundust í fórum hans.