Guðfinna bað Hreiðar að biðjast lausnar

Sveinbjörg Birna Sveinbjörnsdóttir, oddviti Framsóknarmanna og flugvallarvina í borginni er farin í fæðingarorlof. Oddviti nú er Guðfinna Jóh Guðmundsdóttir. Miðað við stöðu á framboðslistum í síðustu sveitarstjórnarkosningum hefði þá Hreiðar Eiríksson átt að koma inn nú sem varmaður í borgarstjórn en ekki Ingvar Jónsson flugstjóri. Af því varð þó ekki.

„Ég heyrði af fæðingarorlofi Sveinbjargar í fréttum en velti ekki fyrir mér mögulegri varamennsku minni í borgarstjórn sem afleiðingu fæðingarorlofs. Svo hringdi Guðfinna í mig í vikunni og benti mér á þetta. Guðfinna bað mig um að biðjast lausnar frá skyldum mínum samkvæmt sveitarstjórnarlögum,“ segir Hreiðar í samtali við Vísi.

Dró sig í hlé á sínum tíma

Hreiðar dró sig í hlé þegar skammt var til kosninga; sagði að hann gæti ekki stutt framboðið á þeim forsendum að honum þótti sem þar væri verið að gera út á popúlísk sjónarmið og ala á andúð gegn útlendingum; með því að vilja afturkalla lóð sem úthlutað hafði verið til Félags múslíma á Íslandi.

Hreiðar segist almennt þeirrar skoðunar að kjörnir fulltrúar eigi að sitja áfram þó þeir segi skilið við þá stjórnmálaflokka sem þeir eru kjörnir fyrir. „Þá skoðun byggi ég á því að kjósendur kjósa lista af fólki og af því leiðir að vilji kjósenda er að þessir tilteknu einstaklingar séu fulltrúar þeirra. Í þessu tilviki tel ég hins vegar litlar líkur á að kjósendur Framsóknar og flugvallarvina hafi greitt listanum atkvæði til að ljá afstöðu minni brautargengi,“ segir Hreiðar glettnislega.

Vill ekki að nafn sitt sé spyrt við skoðanir framboðsins

Og á þeim forsendum varð Hreiðar við ósk Guðfinnu og sendi skrifstofu borgarstjórnar erindi þar sem hann baðst lausnar frá skyldum mínum, ef sveitarstjórnarlög heimiluðu slíka lausn frá störfum. Reyndar segja lögin til um að aðeins sé heimilt að veita lausn ef fulltrúi flytur úr sveitarfélaginu eða getur ekki sinnt skyldum sínum vegna vinnuálags í öðrum störfum.

En, Guðfinna hefur væntanlega verið dauðs-lifandi-fegin að vera laus við þig?

„Já, hún bað mig um að fara. Sjálfur er ég mjög sáttur við að vera búinn að slíta tengsl við þetta fyrirbæri. Ég uni þeim ágætlega að hafa þær skoðanir sem þau hafa, tjá þær og reyna að afla þeim fylgis, en vil síður að nafn mitt sé spyrt við þær.“