Skrifstofur sem sinna sömu verkefnum

stjórnsýsla Ný skrifstofa þjóðhagsmála sem staðsett er í forsætisráðuneytinu, sinnir mjög svipuðu verkefni og skrifstofa efnahagsmála í fjármálaráðuneytinu. Guðrún Þorleifsdóttir, skrifstofustjóri efnahagsmála og fjármálamarkaðar í fjármálaráðuneytinu, sagði orðalagið um þessar skrifstofur nokkuð líkt en getur ekki með vissu sagt að þær vinni sömu vinnuna.

Breytingar á skipulagi forsætisráðuneytisins sem kynntar voru þann 20. október hafa í för með sér að skrifstofa þjóðhagsmála greini stöðu og þróun efnahagsmála innanlands og utan. Um störf skrifstofunnar segir að hlutverk hennar verði „að greina stöðu og þróun efnahagsmála innanlands og utan, meta horfur í efnahagsmálum og móta tillögur í málaflokknum fyrir forsætisráðherra og ríkisstjórn á hverjum tíma.“ Einnig að skrifstofan hafi umsjón með ráðherranefndum um efnahagsmál og ríkisfjármál. Á sama tíma er starfandi skrifstofa efnahagsmála og fjármálamarkaðar í fjármálaráðuneytinu. Skrifstofan „hefur umsjón með undirbúningi og eftirfylgni með efnahagsstefnu ríkisstjórnarinnar, mótun löggjafar um fjármálaþjónustu, samhæfingu opinberrar hagstjórnar og kynningu á efnahags- og fjármálamarkaðsmálum innanlands og utan. Í því skyni annast skrifstofan mat á þróun og horfum í efnahagsmálum og samskipti við Hagstofu Íslands um gerð þjóðhagsspár.“

Fjármálaráðuneytið fer með þessi mál með forsetaúrskurði. Sigurður Már Jónsson, upplýsingafulltrúi forsætisráðuneytisins, segir engan tvíverknað eiga sér stað. „Skrifstofa þjóðhagsmála mun starfa í samvinnu við fjármála- og efnahagsráðuneytið sem ber meginábyrgð á málum er lúta að efnahagsmálum, ríkisfjármálum og fjármálamarkaði, samkvæmt forsetaúrskurði um skiptingu stjórnarmálefna milli ráðuneyta. Áhersla skrifstofu þjóðhagsmála mun verða á lögbundnar ráðherranefndir um efnahagsmál og ríkisfjármál sem starfa undir forystu forsætisráðherra, væntanlegt þjóðhagsráð og almenna efnahagsráðgjöf til forsætisráðherra og ríkisstjórnar á hverjum tíma,“ segir Sigurður Már. „Gert er ráð fyrir að skrifstofustjóri verði skipaður á næstu mánuðum en engin áform eru á þessu stigi um ráðningu annarra starfsmanna.“