Viðskipti innlent

Fastagesturinn Dagur B. hljóp undir bagga með Frú Laugu

Stefán Ó. Jónsson skrifar
Arnar Bjarnason
Arnar Bjarnason vísir/gva
Þrátt fyrir að verslun Frú Laugu að Óðinsgötu 1 í Reykjavík muni þurfa að loka á næstunni og flytja á nýjan stað er óþarfi fyrir viðskiptavini bændamarkaðarins að örvænta; verslunin opnar einungis tuttugu skrefum ofar í götunni – að Óðinsgötu 8b.

Fastagestur Frú Laugu vildi ómögulega missa verslunina úr hverfinu og ákvað því að bjóða fram jarðhæðina á húsi sínu undir reksturinn. Það boð þáðu eigendur Frú Laugu og vonir standa til að verslunin opni á nýjum stað á næstu dögum, heima hjá borgarstjóranum Degi B. Eggertssyni.

Dagur segir í samtali við Vísi að þeim hjónum, Örnu Dögg Einarsdóttur, hafi borist til eyrna að Frú Lauga væri að missa húsnæði sitt neðar í götunni. Það hafi þeim fastagestunum hugnast illa og ákváðu þau því að hlaupa undir bagga með versluninni og bjóða þeim jarðhæðina á húsi sínu undir reksturinn.

Dagur B. Eggertssonvísir/pjetur
Þau borgarstjórahjónin eignuðust hæðina í fyrra og eru nýlega búin að gera hana upp. Því segir Dagur að ekkert hafi staðið í vegi fyrir því að nýta rýmið undir verslunina meðan leit stendur yfir að öðru húsnæði fyrir Frú Laugu.

„Nú ætlum við bara að prófa þetta og sjá hvernig þetta virkar,“ segir Dagur sem bætir við að ómögulegt sé að segja hvað þessi ráðagerð muni lifa lengi. „Þetta er alla vega til reynslu og svo sjáum við hvað framtíðin ber í skauti sér.“

Borgarstjórabústaðurinn hentar vel fyrir verslunarrekstur

Þegar Vísir náði tali af Arnari Bjarnasyni, sem rekur verslanir Frú Laugu ásamt eiginkonu sinni Rakel Halldórsdóttur, voru þau hjónin að ganga frá „samningnum í rólegheitunum.“ Þetta væri allt „tiltölulega nýgeirneglt,“ eins og Arnar komst að orði.

Ástæður flutninganna segir Arnar vera þær að eigandi hússins að Óðinsgötu 1 hyggst opna aðra verslun í rýminu sem áður hýsti Frú Laugu. Því hafi verslun þeirra Rakelar verið á hrakhólum.

„Þau hjónin nálguðust okkur og buðu að leigja á jarðhæðinni hjá sér og við þáðum það því við þurftum jú að skipta um húsnæði,“ segir Arnar sem kveðst spenntur fyrir breytingunum.

Það hafi þannig komið þeim hjónum á óvart hversu vel jarðhæðin að Óðinsgötu 8b henti fyrir verslunarrekstur. Rýmið sé nýuppgert - „og það sé jafnvel skemmtilegra en það sem við vorum í áður, birtan er einhvern veginn öðruvísi en á gamla staðnum,“ bætir Arnar við.

Að sögn Arnars stendur nú yfir vinna við að fá öll tilskilin leyfi frá Reykjavíkurborg og vonir standa til að þau liggi fyrir á næstu dögum. Því megi fara að huga að opnun í nýja húsnæðinu innan tíðar.






Fleiri fréttir

Sjá meira


×