Methagnaður Skoda

Á fyrstu 9 mánuðum þessa árs hagnaðist tékkneski bílaframleiðandinn Skoda meira en fyrirtækið hefur áður gert á sama tíma. Hagnaður Skoda nam 104 milljörðum króna og jókst hann um 12,7% frá síðasta ári.

Skoda seldi 791.500 bíla á þessum 9 mánuðum og jókst salan um 2,2%. Rekstrartekjur jukust um 5,7% og því hefur hver seldur bíll verið nokkru dýrari í ár en í fyrra. Skoda velti 1.325 milljörðum króna á þessum fyrstu 9 mánuðum ársins.

Skoda hóf sölu á nýrri kynslóð Superb, stærsta fólksbíls fyrirtækisins á þriðja ársfjórðungi þessa árs. Hefur honum verið tekið með kostum og á hann þátt í góðri sölu Skoda þetta árið.

Uppfærð útgáfa Octavia kemur á markað árið 2017 og líklega líka 7 sæta jeppi sem mun fást með hefðbundnum brunavélum en einnig sem Plug-In-Hybrid bíll. Skoda mun selja yfir 1 milljón bíla í ár en stefnir að því að selja 1,5 milljón bíla innan nokkurra ára.