Ferðamenn gætu orðið 1,5 milljónir árið 2016

Vísbendingar eru um að 1,5 milljónir ferðamenn heimsæki Ísland á næsta ári samkvæmt því sem fram kemur á vefnum Túristi.is

Túristi bendir á að ferðamönnum hér á landi hafi fjölgað um 26,8 prósent á það sem af er þessu ári miðað við í fyrra. Haldi sú þróun áfram næstu mánuði munu samtals hátt í 1,3 milljónir ferðamanna heimsækja landið í ár.  Erlendu gestirnir voru um 998 þúsund í fyrra.



Mikill vöxtur hjá Icelandair

Þá tilkynntu forsvarsmenn Icelandair að þeir áformuðu að farþegum félagsins myndi fjölga um 15 prósent á næsta ári sem er álíka vöxtur og árin á undan. Líkt og Túristi bendir á þá stendur Icelandair undir nærri tveimur af hverjum þremur ferðum til og frá Keflavíkurflugvelli. Hins vegar hafi erlendum ferðamönnum hér á landi fjölgað hlutfallslega nokkru meira en aukningin hefur verið hjá Icelandair. Á þessu ári fjölgi farþegum Icelandair um 17 prósent en útlit sé fyrir að erlendum ferðamönnum fjölgi um 27 prósent í ár.

“Farþegaspá Icelandair er því góð vísbending um hversu mikið erlendum ferðamönnum muni fjölga og ef tengslin milli fjölda farþega hjá Icelandair og fjölda ferðamanna haldast nokkuð óbreytt má búast við að ferðamenn hér landi verði um 1,5 milljón á næsta ári. Sjö árum fyrr en sérfræðingar Boston Consulting Group spáðu fyrir um í hittifyrra. Fyrr í ár spáði Landsbankinn því að þessu marki yrði náð árið 2017,” segir í greiningu Túrista.



Flugvélum Wow fjölgað um helming

Wow air stefnir á um helmingsvöxt á næsta ári, með fjölgun farþegaflugvéla úr sex í níu. Farþegafjöldi félagsins gæti því aukist um allt að helming árið 2016 en í ár er gert ráð fyrir að farþegar verði um 800 þúsund.