Foreldralausu flóttabörnin

Ég horfi stjörf á sjónvarpsskjáinn þar sem fjallað er um milljónir flóttamanna sem streyma frá stríðshrjáðum Mið-Austurlöndum í þeirri von að finna frið. Verið er að ræða við fjölskyldu á flótta og ég reyni að ímynda mér hvernig tilfinningin sé að þurfa að flýja heimili sitt, fara af stað gangandi með börnin og leggja svo í hættuför yfir Miðjarðarhafið. Staðreyndin er sú að í stríðsátökum er traðkað á mannréttindum þeirra sem eiga enga sök á ástandinu. „Á meðan við erum saman er þetta í lagi,“ segir fjölskyldufaðirinn vongóður við fréttamanninn.

Þarna stoppa ég. Þessi fjölskylda er í skelfilegum aðstæðum. En ótrúlegt en satt, þá eru einstaklingar sem hafa það verra. Hverjir? Jú, börnin sem koma ein. Tölurnar segja okkur að þúsundir flóttabarna hafa komið án fylgdar foreldra til Evrópu á síðustu mánuðum. Þetta eru börn sem misst hafa foreldra sína eða orðið viðskila við þau á leiðinni. Stundum koma þessi börn í fylgd með öðrum börnum en stundum eru þau alein. Flóttabörn sem koma ein síns liðs eru í mikilli hættu á að lenda í höndum þeirra sem ekki eiga undir nokkrum kringumstæðum að koma nálægt börnum. Barnavændi og mansal eru því miður örlögin í sumum tilvikum.

Heimili fyrir flóttabörn

SOS Barnaþorpin sinna neyðaraðstoð fyrir flóttafólk í Evrópu. Samtökin leggja ávallt áherslu á foreldralaus börn og það sama er uppi á teningnum í þessu tilviki. Við hjálpum flóttabörnunum sem koma ein.

Yfir 30 flóttabörn sem komu til Austurríkis án foreldra eignuðust nýtt heimili í SOS Barnaþorpum þar í landi á dögunum. Til stendur að gefa 70 foreldralausum flóttabörnum til viðbótar ný heimili í barnaþorpum þar á næstu þremur mánuðum. Við erum að tala um börn á aldrinum 7-13 ára frá Sýrlandi, Afganistan og Íran. Þau komu öll ein en nú hafa þau eignast fjölskyldu og heimili í SOS Barnaþorpi. Þau þurfa á miklum andlegum stuðningi að halda en í fyrsta skipti í langan tíma eiga þau von um betra líf.

Hægt er að leggja málefninu lið með því að hringja í númerið 907-1001 (1.000 krónur) eða í 907-1002 (2.000 krónur). Einnig er hægt að leggja inn á reikning 334-26-52075, kt. 500289-2529 með skýringunni: Flóttafólk. Framlag þitt getur bjargað einu barni.