Kú tekur í útrétta sáttahönd nýráðins forstjóra MS

Forsvarsmenn mjólkurbúsins Kú segjast fagna þeirri áherslubreytingu sem Mjólkursamsalan MS hefur boðað.

MS greindi frá því í gær að það muni bjóða þeim sem vilja framleiða úr mjólk að fá allt að 300 þúsund lítra af mjólk á ári, á sama verði og MS greiðir til bænda.

MS sagði þetta gert til að styrkja smærri framleiðendur og gera nýjum aðilum auðveldara með að hefja rekstur. MS hyggst árlega bjóða smærri framleiðendum allt að 300 þúsund lítra af ógerilsneiddri hrámjólk á 85 krónur á hvern lítra.

Í tilkynningu frá Kú segir að þetta jafngildi 11 prósenta lækkun frá almennu verði á hrámjólk. „Þrátt fyrir 4% hækkun á mjólk þann 1. ágúst sl. hefur Mjólkurbúið Kú ekki hækkað verð á sínum vörum. Fyrir fyrirtæki eins og okkar hefur þessi lækkun mjög mikla þýðingu og þá ekki síður að geta loks keypt hráefni til framleiðslu okkar á jafnréttisgrunni.

Eins og alkunna er hefur Mjólkurbúið Kú um árabil talið sig njóta mun lakari viðskiptakjara en framleiðendur tengdir MS. Fyrirtækið hefur þurft að leita réttar síns hjá samkeppnisyfirvöldum sem hafa málið enn til meðferðar.

Við hjá Mjólkurbúinu Kú tökum í útrétta sáttahönd nýráðins forstjóra MS. Við horfum bjartsýn fram á veg og erum staðráðin í að nýta þetta skref í jafnræðisátt til þess að efla starfsemi okkar íslenskum neytendum til hagsbóta,“ segir í tilkynningunni.