Guðmundur Rafnkell nýr framkvæmdastjóri hjá Samvinnufélagi útgerðarmanna í Neskaupstað

Guðmundur Rafnkell Gíslason mun taka við embætti framkvæmdastjóra Samvinnufélags útgerðarmanna í Neskaupstað um miðjan október. Freysteinn Bjarnason mun þá láta af störfum sökum aldurs en hann hefur gegnt starfinu frá árinu 2005.

Guðmundur Rafnkell hefur að undanförnu gegnt starfi framkvæmdastjóra Sjónaráss.

Í tilkynningu frá Samvinnufélagi útgerðarmanna í Neskaupstað kemur fram að Guðmundur Rafnkell sé 45 ára að aldri og búsettur í Neskaupstað ásamt eiginkonu og tveimur dætrum.

„Hann lauk B.ed.-prófi frá Háskólanum á Akureyri árið 1997 og hefur auk þess lokið fjölmörgum námskeiðum á sviði stjórnunar-, öryggis- og mannauðsmála. Guðmundur annaðist rekstur Hótels Egilsbúðar í Neskaupstað á árunum 1997-2005 og var mannauðsstjóri hjá ESS Support Services á Reyðarfirði á árunum 2005-2007. Frá árinu 2008 hefur hann síðan gegnt starfi framkvæmdastjóra Sjónaráss. Guðmundur hefur mikla reynslu af sveitarstjórnarmálum en hann átti sæti í bæjarstjórn Neskaupstaðar og síðar Fjarðabyggðar í 15 ár og var forseti bæjarstjórnar Fjarðabyggðar á árunum 2006-2010. Hann sat í stjórn Sambands sveitarfélaga á Austurlandi á árunum 2004-2010 og Byggðastofnunar á árunum 2011-2014. Frá unga aldri hefur Guðmundur tekið virkan þátt í félagsstörfum og tónlistarlífi.

Samvinnufélag útgerðarmanna í Neskaupstað var stofnað árið 1932 og á sér merka sögu. Nú rekur félagið tvær verslanir, Fjarðasport í Neskaupstað og Veiðifluguna á Reyðarfirði auk þess sem það hefur umboð fyrir Tryggingamiðstöðina og annast verkefni í samstarfi við ÁTVR. Þá hefur félagið sinnt framkvæmdastjórn fyrir Olíusamlag útvegsmanna í Neskaupstað. Samvinnufélagið á eignarhlut í Síldarvinnslunni hf. og ráðstafar drjúgum hluta árlegs arðs af þeirri eign til menningar- og félagsmála innan fjallahrings Norðfjarðar,“ segir í tilkynningunni.