Helgi Hrafn nýr kafteinn Pírata

Helgi Hrafn Gunnarsson hefur tekið við stöðu formanns eða kafteins Pírata af Birgittu Jónsdóttur. Birgitta tekur við stöðu þingflokksformanns.

Helgi Hrafn segir að honum sé í raun mjög illa við titla sem þessa, en að störf á þinginu kalli á þá.

Í tilkynningu frá þingflokknum segir í aðdraganda þingsins fari nú fram „hin hefðbundna rótering“ hlutverka.

„Formennska í Pírötum er þó eingöngu formlegs eðlis vegna þinglegra prótócolla og hefur ekki í för með sér nein sérstök valdsvið eða ábyrgð. Þess vegna hefur formaður flokksins ávallt hafnað sérstöku launaálagi frá Alþingi fyrir formennskuna og mun Helgi Hrafn einnig hafna álaginu nú.“