Starfa með stærstu skipafélögum heims

Tæknifyrirtækið Marorka, sem sérhæfir sig í orkustjórnun í sjávarútvegi og flutningum, hefur á síðastliðnum mánuðum undirritað samninga um uppsetningu og umsjón hugbúnaðar fyrirtækisins við nokkur af stærstu skipafélögum heims. Orkustjórnunarbúnaður Marorku er því í dag um borð í mörg hundruð skipum, sem mörg hver eru tugfalt stærri en flaggskip íslenska kaupskipaflotans.

Samstarf við þá stærstu

Á síðustu vikum hefur Marorka undirritað samninga við tvö stór skipafélög. Fyrst skal nefna Nordic Tankers – rótgróið danskt félag sem starfrækir 66 olíuflutningaskip. Þá skal nefna Abu Dhabi National Tanker Co/National Gas Shipping Company (ADNATC/NGSCO), sem á og gerir út flota olíu- og gasflutningaskipa.

Í lok júní samdi Marorka við Mideast Ship Management Ltd. um að setja upp orkustjórnunarkerfi í 26 olíuflutningaskipum fyrirtækisins. Fyrirtækið er að fullu í eigu The National Shipping Company of Saudi Arabia (Bahri), eins allra stærsta skipafélags heims. Þá tilkynnti Marorka í febrúar um samning við annað af stærstu gámaflutningaskipafélögum heims – United Arab Shipping Company (UASC) um uppsetningu orkustjórnunarkerfa í skipakost þess.

Hér eru þó aðeins nokkrir samningar nefndir sem hafa verð gerðir á þessu ári en Marorka er í samstarfi við 65 skipafélög um allan heim þegar allt er talið.

Útstöðvar um allan heimOle Skatka Jensen, forstjóri Marorku, segir aðspurður um tæknilausnir og búnað fyrirtækisins að hann dragi úr olíunotkun og þar með eldsneytiskostnaði og mengun – nokkuð sem er í forgrunni allra þeirra sem starfa í orkufrekri atvinnustarfsemi í dag. Ef tekið er dæmi um 10% sparnað af olíueyðslu risaolíuskips á langri siglingaleið þá þarf ekki mikið hugmyndaflug til að sjá hversu gríðarlega hagsmuni stór félög hafa af því að nýta tækni eins og Marorka býður.

Um þennan eftirtektarverða árangur fyrirtækisins segir Ole að hann eigi rætur í sóknaráætlun fyrirtækisins sem var samþykkt af stjórn félagsins eftir innspýtingu hlutafjár árið 2014. Net útibúa hefur verið stækkað markvisst árin 2014 og 2015 – þróun sem mun halda áfram allt næsta ár. Á þeim tíma opnaði Marorka skrifstofur í Kaupmannahöfn og Singapúr – eins í Dúbaí í janúar síðastliðnum og þá var útstöð fyrirtækisins í Aþenu í Grikklandi styrkt. Bráðlega verða opnaðar skrifstofur í Suður-Kóreu og Kína.

„Þetta eru mikilvæg skref sem undirstrika þann áhuga sem við finnum fyrir á okkar vöru og þjónustu. Undirliggjandi þrýstingur um að hlýða umhverfisregluverki samtímans, óstöðugt olíuverð og áhyggjur almennings af umhverfinu og loftlagsmálum er að knýja skipafélögin til að endurmeta stöðu sína í tilliti til umhverfismála og hvernig má sækja fram í nýju viðskiptaumhverfi,“ segir Ole og bætir við að næstu tvö ár skeri úr um hverjum tekst að nýta sér orkustjórnun til sóknar á mörkuðum. „Þau félög sem fjárfesta í þessari tækni munu móta markaðinn til framtíðar.“

VitundarvakningOle segir að virði einstakra samninga sé trúnaðarmál en viðurkennir fúslega að samningar við stærstu skipafélög heims á stuttum tíma gefi Marorku mikil tækifæri til sóknar á næstu misserum. Skipafélög um allan heim séu að átta sig á möguleikum orkustjórnunar og Marorka er að hans mati vel staðsett til að nýta sér þá vitundarvakningu.

En hvað þarf til? Ole segir að allir innan viðkomandi skipafélags þurfi að vera á sömu blaðsíðu – bæði stjórnendur í landi og áhafnir einstakra skipa þar sem þurfa að vera úrræði til að gera nauðsynlegar mælingar og sinna eftirliti. Þess vegna hefur Marorka styrkt ráðgjafarteymi fyrirtækisins sem hafa t.d. kennt og þjálfað áhafnir skipa í jómfrúrferðum – sem mörg hver eru í flokki þeirra stærstu í heiminum.

Ole segir jafnframt að skipaiðnaðurinn sé íhaldssamur og hver samningur sem er undirritaður sé tilkominn vegna þrotlausrar vinnu í marga mánuði eða ár. Hins vegar eru talsvert margir samningar í farvatninu hjá Marorku.

Þurfa fleiri hámenntaða starfsmenn„Stóra viðfangsefnið er að bjóða þjónustu í hæsta gæðaflokki til sístækkandi hóps viðskiptavina um allan heim. Við erum að mæta þessu með því að opna skrifstofur á lykilstöðum og fjölga starfsmönnum, hámenntuðum forriturum og verkfræðingum, sem verða að stærstum hluta við vinnu í höfuðstöðvum fyrirtækisins á Íslandi.“

Marorka er að stærstum hluta í eigu þýska fjárfestingarfélagsins Mayfair sem á tæplega 74% hlut en einnig á fyrirtækið Klappir ehf. tæp 18%. Klappir er fjölskyldufyrirtæki Jóns Ágústs Þorsteinssonar, stofnanda Marorku, sem byggir á hans eigin hugviti og doktorsritgerð.