Kaupþing Lúx. átti til að koma fram fyrir hönd hluthafa í hluthafaskrá

Eggert Jónas Hilmarsson starfaði sem framkvæmdastjóri lögfræðisviðs Kaupþings í Lúxemborg á árunum sem hin meintu brot í Marple-málinu áttu sér stað. Eggert var meðal þeirra vitna sem gaf skýrslu í Héraðsdómi Reykjavíkur í dag vegna málsins en hann gaf svaraði spurningum í gegnum síma. Það kom í hlut sækjanda að spyrja hann í upphafi.

„Marple var félag sem var til í bankanum í Lúxemborg,“ sagði Eggert. „Þetta var eitt af þremur fyrirtækjum sem var stofnað svona er ske kynni að grípa þyrfti til þess. Upphaflega var það stofnað af Kaupþingi og það var notað er kom að viðskiptunum með bréfin í Exista.“

Meðal gagna málsins eru stofnskjöl Marple sem Skúli Þorvaldsson undirritaði sem eigandi félagsins í júní 2007 nokkrum mánuðum áður en Exista viðskiptin gengu í gegn. Fyrir dómi hefur Skúli sagt að hann hafi aldrei heyrt af félaginu fyrr en eftir hrun og aldrei hafi verið rætt við hann um það.

Eggert sagði að til að félög á borð við Marple séu „tekin af lager“ þurfi að ganga frá pappírum er varða eignarhald og skrifa undir skjöl þess efnis að taka yfir félagið. Stundum hafi þess verið óskað að bankinn kæmi fram fyrir hönd félagsins á pappírum en ekki raunverulegur eigandi þess.

Sjá einnig: Marple-málið: Skúli segist hafa frétt af félaginu eftir hrun

Ekki hafa allir verið sammála um eignarhald á Marple. Skúli Þorvaldsson staðhæfði í skýrslutöku að hann hefði aldrei keypt hlut í félaginu eða látið fé renna í það.

Halldór Þ. Birgisson, verjandi Skúla, hefur spurt flesta þá sem gefið hafa skýrslu að því hvort þeir kannist við félagið og hvenær það var stofnað. Einnig hefur hann vísað í skjal sem er útskrift af hluthöfum Marple í ágúst 2007 úr Legilux, lúxemborgísku hluthafaskránni. Þar sé Kaupþing Lúxemborg skráð sem eigandi félagsins. Hafði hann sagt að þetta renndi stoðum undir það að Skúli hefði aldrei átt félagið og að samkvæmt lögum í Lúxemborg væri ólöglegt að skrá nokkurn annan en eiganda þess í slíka skrá.

„Ég sá gögn hjá okkur um að félaginu hafi verið afsalað til Skúla,“ sagði Eggert er Halldór spurði hann út í málið. „Magnús [Guðmundsson] hafði líka tjáð mér að Skúli ætti það. Í upphafi var alltaf lagt út með það Magnús myndi ræða við Skúla um að verða eigandi félagsins. Ég veit ekki hvernig það fór. Magnús og Þórður Emil, viðskiptastjóri, sáu um það að vera í samskiptum við hann.“

„Það kom fyrir að eigendur vildu ekki koma fram í hluthafaskrá félaga og þá gat bankinn komið þar fram fyrir hönd umbjóðanda síns,“ sagði Eggert aðspurður um útskriftina úr Legilux. „Það er alltaf skráður einhver sem er „beneficial owner“ fyrri hvert félag samt sem áður.“

„Vitni á að bera til um atvik máls“

Einnig voru teknar skýrslur af fólki sem starfaði á bókhaldssviði, reikningshaldi, verðbréfa- og vörsluhluta og við frágang á erlendum greiðslum Kaupþings. Voru þeir spurðir út í aðkomu sína að greiðslum þeim er ákært er fyrir. Flestir gáfu þau svör að þeir hefðu ekkert óeðlilegt séð við þær eða að þeir myndu illa eftir málsatvikum enda átta ár liðin frá að þau áttu sér stað. Á meðan ein vitnaleiðslan stóð yfir gerði Sigurður G. Guðjónsson athugasemdir við aðferðir saksóknara.

„Vitni á að bera til um atvik máls en ekki gef álit. Það er ekki rétt að spyrja vitni út í hvort þetta eða hitt fullnægi einhverjum verklagsreglum. Það er rétt að hætta öllu svona rugli,“ sagði hann. Er vitnið var að yfirgefa salinn sagði Sigurður að þegar það var yfirheyrt hjá sérstökum saksóknara við rannsókn málsins hafi verið villt um fyrir því í inngangi yfirheyrslanna og það þráspurt um færslur sem það vissi ekkert um. Vitnin stöldruðu flest stutt við í dómsalnum og er eitt þeirra yfirgaf salinn hafði Sigurður á orði að það sýndi best hve tilgangslausar vitnaleiðslurnar væru.

Gert er ráð fyrir því að vitnaleiðslum ljúki fyrir hádegi á morgun. Málflutningur hefst á fimmtudagsmorgunn. Sækjandi hefur sagt að hann geri ráð fyrir að þeir þurfi á fjórðu klukkustund til að flytja mál sitt og er stefnt að því að hann auk tveggja verjenda geti flutt mál sitt á fimmtudag. Gangi allt eftir ætti málflutningi að ljúka á föstudag.