Fjárfestar kaupa 5% hlut í Símanum

Arion banki hefur selt hópi fjárfesta um 5% hlut í Símanum. Fjárfestahópurinn er samsettur af fjárfestum frá fimm löndum auk nokkurra af stjórnendum Símasamstæðunnar. Stefnt er að skráningu Símans á markað í haust.

Í tilkynningu frá Símanum segir að fyrir hópnum fari Bertrand Kan, hollenskur fjárfestir með áratuga reynslu af fjárfestingarstarfsemi á sviði fjarskipta, en það var Orri Hauksson, forstjóri Símans, sem átti frumkvæði að því að hópurinn var myndaður.

Arion Banki á eftir söluna um 33% í Símanum. Stefnt er að því að hlutabréf í Símanum verði tekin til viðskipta á Aðalmarkaði Nasdaq Iceland í haust og stefnir bankinn að því að minnka eignarhlut sinn í félaginu með almennu útboði. 

"Jákvætt að sjá áhuga erlendra og innlendra fjárfesta. “

Bertrand Kan, hollenski fjárfestirinn sem leiðir hóp fjárfestanna, vonast til þess að alþjóðleg reynsla hópsins komi fyrirtækinu að notum. Hann hefur áður komið nálægt viðskiptum með Símann en leiddi söluferli Símans fyrir hönd Morgan Stanley fyrir um áratugi síðan.

„Það er mjög spennandi að fá að taka þátt í að skrifa næsta kafla í sögu Símans, nú þegar skráning félagsins á hlutabréfamarkað er handan við hornið. Ég kynntist félaginu og íslenskum fjarskiptamarkaði fyrst fyrir um áratug þegar ég hafði með höndum það verkefni að leiða söluferli Símans fyrir hönd Morgan Stanley. Heimurinn hefur tekið miklum breytingum síðan þá, en ég vona að alþjóðleg reynsla mín og annarra fjárfesta í þessum hópi geti komið fyrirtækinu að notum í framtíðinni.“

Höskuldur H. Ólafsson, bankastjóri Arion Banka telur að það sé jákvætt að erlendir sem og innlendir fjárfestar sýnu Símanum áhuga. Arion Banki hyggst halda almennt útboð í haust til að minnka eignarhlut sinn í Símanum.

„Það er gleðilegt að sjá áhuga fjárfesta á Símanum nú í aðdraganda skráningar félagsins í kauphöll. Okkur þykir jákvætt að sjá bæði erlenda og innlenda fjárfesta í þeim hópi sem nú kaupir hlut í Símanum og jafnframt að stjórnendur samstæðunnar séu orðnir hluthafar, en það sýnir trú þeirra á félaginu og framtíð þess.“