Verðbólgan mælist 2,2 prósent

Verðbólga mælist 2,2 prósent á tólf mánaða tímabili samkvæmt nýjustu tölum Hagstofunnar. Vísitala neysluverðs miðuð við verðlag í ágúst hækkaði um 0,53 prósent frá fyrri mánuði. Vísitala neysluverðs án húsnæðis hækkaði um 0,50% frá júlí.

„Sumarútsölur eru að hluta til gengnar til baka og hækkaði verð á fötum og skóm um 5,4% (áhrif á vísitöluna 0,21%). Verð á mat og drykkjarvörum hækkaði um 1,1% (0,16%) og kostnaður vegna húsnæðis, hita og rafmagns hækkaði um 0,5% (0,14%). Verð á bensíni og olíum lækkaði um 4,0% (-0,15%).

Síðastliðna tólf mánuði hefur vísitala neysluverðs hækkað um 2,2% og vísitala án húsnæðis hefur hækkað um 0,7%.

Vísitala neysluverðs samkvæmt útreikningi í ágúst 2015, sem er 432,3 stig, gildir til verðtryggingar í október 2015. Vísitala fyrir eldri fjárskuldbindingar, sem breytast eftir lánskjaravísitölu, er 8.536 stig fyrir október 2015,“ segir í frétt Hagstofunnar.