Golfhringjunum fækkað vegna anna

Lárus L. Blöndal hæstaréttarlögmaður var í síðustu viku skipaður stjórnarformaður Bankasýslu ríkisins. Lárus er meðeigandi á lögfræðistofunni Juris auk þess að vera forseti Íþrótta- og Ólympíusambands Íslands (ÍSÍ). Málefni Bankasýslunnar og stærstu eignar hennar, Landsbankans, hafa verið mjög til umræðu síðustu vikur.

Lárus segir Bankasýsluna afar mikilvæga fyrir fjárhag ríkisins. „Það eru auðvitað mjög miklir hagsmunir þarna undir. Þetta eru um 14 prósent af eignum ríkissjóðs samkvæmt ríkisreikningi. Þetta eru verðmæti sem þarf að huga að,“ segir hann.

Lárus segir að heimild sé í lögum til að selja um 28 af 98 prósenta eignarhlut Bankasýslunnar í Landsbankanum. Samkvæmt lögunum sé það Bankasýslunnar að leggja fram tillögu um hvort eða hvenær hlutur ríkisins í fjármálafyrirtækjum verði seldur og undirbúa vinnu við slíkar tillögur. Lárus segir slíkar tillögur ekki vera komnar fram af hálfu Bankasýslunnar. „En þetta er hluti af verkefnum Bankasýslunnar auk þess að leggja mat á hvenær tími er kominn til að gera eitthvað í þeim málum.“

Lárus segir hina nýskipuðu stjórn ekki enn hafa fundað og því hafi ekki verið tekin nein afstaða til nýrra höfuðstöðva Landsbankans af hennar hálfu en stefnt sé á að fyrsti fundur stjórnarinnar verði í vikunni. „Það mál verður skoðað eins og önnur sem varða eignarhluti ríkisins í fjármálafyrirtækjum,“ segir Lárus.

Landsbankinn hefur legið undir gagnrýni fyrir að skila ekki nægri arðsemi af grunnrekstri sínum. Steinþór Pálsson, bankastjóri Landsbankans, sagði sjálfur í ársskýrslu Landsbankans að arðsemi af reglulegum rekstri Landsbankans hefði verið of lítil. „Það er ekki bara Landsbankinn sem er í þessari stöðu. Ég geri ráð fyrir því að allir bankarnir séu að vinna í þeim málum. Það má segja að þetta tengist efnahagslífinu í heild. Þegar betur árar er viðbúið að það verði meira um að vera í bankakerfinu,“ segir hann.

Lárus er áhugamaður um golf og er meðlimur í Golfklúbbi Kópavogs og Garðabæjar. Hann segir golfið frábæra íþrótt sem sameini útiveru, góða hreyfingu og skemmtilegan félagsskap. Lárus segist þó fara allt of sjaldan í golf vegna anna í ýmsum störfum. Forgjöfin hafi því verið á uppleið, hún hafi lægst verið í 13,1 en hafi hækkað í 14,4 að undanförnu. „Það er mikilvægt verkefni og aðkallandi að snúa þessari þróun við á næstunni,“ segir Lárus.